Anëtarja e BE-së, Bullgaria, shënoi të enjten hyrjen e saj në zonën euro me një shfaqje monedhash euroje në fasadën e bankës qendrore në Sofje dhe me fishekzjarrë për të festuar një moment historik të shumëpritur.

Që nga mesnata, euro u bë monedha e vendit dhe leva kaloi në histori, raporton Reuters.

Hyrja e Bullgarisë në zonën euro do ta çojë numrin e evropianëve që përdorin këtë monedhë në mbi 350 milionë. Vendi i fundit që iu bashkua grupit të monedhës së përbashkët ishte Kroacia në janar 2023.

“Paratë tona do të jenë në një monedhë tjetër – nëse kam 10,000 leva, tani do të kem 5,100 euro. Është e gjitha njësoj. Dhe mendoj se do të jetë më mirë,” tha Stefan Bisterkov, instruktor vozitjeje.

Përveç ndryshimit të monedhës, të bëhesh anëtarja e 21-të e zonës euro do të thotë që Bullgaria merr një vend në Këshillin Drejtues të Bankës Qendrore Evropiane, i cili përcakton normat e interesit.

Qeveritë e njëpasnjëshme bullgare janë përpjekur ta ndërmarrin këtë hap që kur vendi ballkanik me 6.7 milionë banorë iu bashkua BE-së në vitin 2007. Bullgarët janë të ndarë për këtë çështje, tregojnë sondazhet e opinionit, megjithëse bizneset janë kryesisht pro.

“Pritshmëritë e mia nga (miratimi i) euros janë pozitive, nuk mendoj se do të ketë ndonjë gjë për t’u shqetësuar, përkundrazi. Ne vetëm do të përfitojmë nga kjo dhe do të jetë vetëm më e dobishme për ne,” tha Antonia Tsvetkova, argjendare.