Sipas raportimeve, rreth orës 14:30, në një oborr të brendshëm në rrugën Porzellangasse, janë shembur pjesë të skelës dhe një strukturë mbajtëse.

Sipas të dhënave të para nga shërbimi i emergjencës në Vjenë, një punëtor 45-vjeçar ka pësuar lëndime që i rrezikojnë jetën. Frika se mund të kishte edhe punëtorë të tjerë të zënë nën rrënoja apo të vdekur u konfirmua rreth orës 18:00.

Aksidenti ndodhi gjatë punimeve të betonimit në kuadër të zgjerimit të një kati të sipërm. Sipas zëdhënësit të zjarrfikësve, Martin Hofbauer, alarmi për ngjarjen u dha rreth orës 14:30. Pas rreth 90 minutash, shërbimi i emergjencës raportoi për personin e plagosur rëndë.

Disa orë më vonë u bë e qartë shkalla e plotë e aksidentit: pasi u njoftuan familjarët e viktimave, zëdhënësi konfirmoi se katër persona kishin humbur jetën.

Më herët, automjetet e policisë kishin bllokuar hyrjen në kantier, me gjasë për të mundësuar largimin e trupave të viktimave. Ndërkohë, në vendngjarje kishte mbërritur edhe shërbimi i ndihmës në raste katastrofash i Vjenës.

Sipas Hofbauer, gjatë aksidentit u shemb e gjithë konstruksioni bashkë me pesë personat që ndodheshin mbi të. Në nxjerrjen e të plagosurit rëndë ndihmuan edhe punëtorët e tjerë, së bashku me ekipet e shpëtimit që kishin mbërritur në vendngjarje.

Siç shpjegoi zëdhënësi i zjarrfikësve, operacioni i shpëtimit ishte jashtëzakonisht i vështirë. Në disa raste, materialet e ndërtimit duhej të hiqeshin me duar të zhveshura.

Për këtë arsye, punëtori i plagosur rëndë qëndroi për disa minuta në vendin e aksidentit para se të nxirrej. Shërbimi i emergjencës bëri të ditur se 45-vjeçari kishte pësuar lëndime të rënda në kokë dhe në shtyllën kurrizore, si dhe fraktura në krahë.