Arabia Saudite dhe Kuvajti kanë hequr kufizimet për përdorimin e bazave ushtarake dhe hapësirës ajrore nga Shtetet e Bashkuara, të lidhura me operacionet rreth Ngushticës së Hormuzit, raporton Wall Street Journal.

Ky vendim largon një pengesë kyçe për përpjekjet e SHBA-së për të rifilluar operacionet e shoqërimit të anijeve tregtare në këtë rrugë ujore strategjike.

SHBA kishte pezulluar “Project Freedom” pak kohë pasi kishte nisur, ndërsa operacioni varej shumë nga bazat dhe hapësira ajrore saudite dhe kuvajtiane, për shkak të numrit të madh të avionëve amerikanë që mbronin anijet.

Duke folur më herët gjatë kësaj jave, sekretari amerikan i Mbrojtjes, Pete Hegseth, tha se një “kupolë e fuqishme e kuqe, e bardhë dhe blu” është krijuar mbi Ngushticën e Hormuzit.

“Shkatërrues amerikanë janë në detyrë, të mbështetur nga qindra avionë luftarakë, helikopterë, dronë dhe avionë mbikëqyrës, duke ofruar mbikëqyrje 24/7 për anijet tregtare paqësore”, shtoi ai.

Heqja e kufizimeve nga Arabia Saudite dhe Kuvajti mund të rrisë gjithashtu opsionet e SHBA-së nëse Donald Trump vendos të rifillojë bombardimet, diçka që ai më herët ka paralajmëruar nëse nuk arrihet marrëveshje me Iranin.