Me shpinë të kthyer kah deti,

kryeministri Albin Kurti po u tregonte grekëve se si Kasandra ishte e mallkuar ta thoshte të vërtetën,

por askush të mos i besonte.

Për arsye të njohura vetëm për Homerin,

grekët nuk e kanë një mit për dikë që gënjen vazhdimisht,

por të gjithë i besojnë.

Me këtë rast,

u pa se mitologjia ende nuk ka mbaruar punë.

…

Pas luftës,

duke kërkuar familjen në Mitrovicë,

një ushtar i KFOR-it më thirri:

“Hej, Kasandra!”

U gëzova.

Sepse, gjatë luftës… më vjen pak zor ta them, ama s’jam dukur aspak e bukur.

Veç trupi…

Flokët i kishin mbuluar malet.

Me një krehër kriheshim të gjithë.

Maj 1999.

Të gjitha vajzat e gratë i prenë flokët me një palë gërshërë.

Unë jo.

Mendoja se vuajtja s’duhet të duket e shëmtuar.

…

Krahasimi me Kasandrën, megjithatë, nuk më shkonte.

Sepse,

anipse mund të dukem e dyshuar, shqiptarët më besojnë.

Por nuk gëzohem për këtë.

(Prandaj duhet ta kem sozinë time diku në mitologji.)

Përveç që më besojnë…

edhe më kërkojnë këshilla.

Se si kam arritur këtë…

e di vet.

…

Greqia nuk e njeh pavarësinë e Kosovës.

Pikërisht për këtë arsye, në shenjë proteste, kryeministri ia ktheu shpinën detit të tyre.

…

Në simpozium u fol edhe për Akilin dhe Kasandrën.

Temë kjo shumë e rëndësishme për të ardhmen e njerëzimit.

Për fat, Akili nuk u zemërua.

Kasandrës, si zakonisht, nuk i besoi askush.

Askush nuk e shpalosi thembrën e vet.

As kryeministri.

As unë… kurrë s’e kam treguar timen.

Shumica nuk e dinin kush ishte Akili.

Kasandrën greke e njihnin nga telenovela e Venezuelës.

Kjo e bëri diskutimin edhe më akademik.

Në simpozium nuk u fol për çamët.

Ata nuk janë mit.

Organizatorët ishin të specializuar vetëm për mite.

…

Dikush e pyeti kryeministrin se si arrin t’i fitojë zgjedhjet, ndonëse krejt mediat dhe gazetarët janë kundër tij.

Kryeministri nuk e zbuloi formulën.

Një grek, njohës i miteve, mbeti i habitur.

…

Greqia është aq e humbur në mite,

sa Kosovës ia pranon kryeministrin,

por nuk ia pranon shtetin.

…

P.S.

Ky shkrim dëshmon edhe një herë

se jam e pavarur.

Prandaj mos më besoni lehtë.

…

AUTOKRITIKË

Unë besoj në mrekulli.