Një prodhim i ri televiziv po shënon sukses të rrallë në industrinë turke të serialeve, duke tërhequr miliona shikues dhe duke regjistruar shifra mbresëlënëse si në televizion, ashtu edhe në platformat digjitale.

Bëhet fjalë për serialin “Daha On Yedi”, i cili transmetohet në Kanal D dhe po konsiderohet si një nga hitet më të mëdha të këtij sezoni televiziv.

Suksesi i tij reflektohet qartë edhe në kanalin zyrtar në YouTube, ku episodi i parë ka arritur rreth 30 milionë shikime. Vetëm gjatë tri ditëve të para pas publikimit, premiera regjistroi 10.3 milionë klikime, duke tërhequr menjëherë vëmendjen e publikut.

Përveç suksesit në internet, “Daha On Yedi” po dominon edhe audiencën televizive. Seriali transmetohet çdo të diel dhe shifrat e shikueshmërisë po rriten nga java në javë, duke e pozicionuar atë në krye të renditjeve.

Në qendër të ngjarjes është Arasi, një 17-vjeçar që është rritur në një mjedis të mbushur me gënjeshtra dhe sekrete.

Jeta e tij ndryshon rrënjësisht kur zbulon se vëllai, të cilin e kishte besuar të vdekur, në të vërtetë është ende gjallë.

Pas këtij zbulimi, Arasi nis një rrugëtim të rrezikshëm dhe emocional në kërkim të së vërtetës. Gjatë këtij udhëtimi, ai përballet me tradhti, intriga dhe një rrjet të gjerë mashtrimesh, të mbrojtura me çdo kusht nga njerëzit më të afërt të tij.

Përplasja mes pafajësisë së një të riu dhe botës së errët të sekreteve familjare është një nga elementet që e ka bërë historinë veçanërisht tërheqëse për publikun.

Me ritmin e fortë të ngjarjeve, ngarkesën emocionale dhe misteret që zbulohen gradualisht, “Daha On Yedi” po konfirmohet si një nga fenomenet më të mëdha televizive të sezonit në Turqi.