Tërmeti që goditi Kolumbinë sot është ndjerë edhe në disa pjesë të Venezuelës, një vend që ende po përballet me pasojat e dy tërmeteve të 24 qershorit.

Autoritetet atje kanë nisur vlerësimin e situatës në shtetet kufitare Tachira dhe Zulia, bëri të ditur guvernatori i Tachiras, Freddy Bernal, raporton CNN.

“Për momentin, Mbrojtja Civile po kryen vlerësime dhe po pranon raportime për gjendjen e infrastrukturës në të gjithë shtetin. Deri tani nuk ka probleme serioze dhe, më e rëndësishmja, nuk raportohet për viktima”, deklaroi Bernal përmes një postimi në platformën X.
Ai tha se ekipet e emergjencave janë vënë në gatishmëri dhe se janë aktivizuar planet e reagimit ndaj emergjencave.

“U bëjmë thirrje qytetarëve të qëndrojnë të qetë dhe të bashkëpunojnë me autoritetet”, shtoi guvernatori.