Charles Spencer, vëllai i Princeshës Diana, do të publikojë në shtator një libër kushtuar jetës dhe kujtimeve të tij për motrën, në prag të 30-vjetorit të vdekjes së saj.

Libri do të titullohet “Swan Song: Diana, My Sister” dhe, sipas shtëpisë botuese Michael Joseph, pjesë e Penguin, do të jetë hera e parë që Earl Spencer flet publikisht dhe në mënyrë të zgjeruar për Dianën.

Në libër, Spencer rrëfen jetën e motrës së tij, si dhe ditët dramatike që pasuan vdekjen e saj. Vepra pritet të publikohet më 22 shtator në Mbretërinë e Bashkuar.

“Me 30-vjetorin e vdekjes tragjike të Dianës që po afrohet, jam përballur sërish me një numër të madh kërkesash për intervista rreth motrës sime”, tha Spencer.

“Kjo më bindi që t’i shkruaj njëherë e përgjithmonë mendimet dhe kujtimet e mia, në vend që të vazhdoj të lexoj me shqetësim opinionet e të tjerëve, shumë prej të cilave bazohen në të pavërteta që me kalimin e kohës janë pranuar si fakte.”

Sipas Spencer, qëllimi i librit është të tregojë atë që ai e konsideron “të vërtetën për Dianën”, nga këndvështrimi i vëllait të saj.

“Synimi i këtij libri është të tregojë të vërtetën për Dianën nga perspektiva e vëllait të saj, ashtu siç u përpoqa të bëja kur fola në funeralin e saj. Ashtu si në fjalimin tim të atëhershëm, dua të flas në emër të Dianës dhe ta bëj këtë në një mënyrë hapur pozitive”, u shpreh ai.

Charles Spencer mbajti fjalimin mortor për motrën e tij në Westminster Abbey në shtator të vitit 1997, pak ditë pasi Diana humbi jetën më 31 gusht.

Botuesi paralajmëron “zbulime që do të tërheqin shumë vëmendje”

Daniel Bunyard, drejtor botues në Penguin Michael Joseph, tha se libri përmban “shumë zbulime që do të tërheqin vëmendje të konsiderueshme”, por njëkohësisht është konceptuar si një homazh për gruan që mbeti një prej figurave më të dashura të familjes mbretërore britanike.

Vetë Spencer shpreson që libri të tërheqë jo vetëm ata që e kujtojnë Dianën gjatë jetës, por edhe brezat më të rinj që nuk patën mundësi ta përjetonin periudhën e saj më të famshme.

“Shpresoj që ky libër të jetë me interes për të gjithë ata që ende e ruajnë me dashuri kujtimin e Dianës”, tha ai.

“Do të isha shumë i lumtur nëse edhe ata që janë tepër të rinj për ta kujtuar në kulmin e saj, pasi ta lexojnë librin, të ndiejnë se e kuptojnë se kush ishte në të vërtetë: një karakter unik dhe dinamik, plot dashuri, karizëm dhe dyshime për veten.”

Spencer e përshkroi motrën e tij si një grua që jetoi me intensitet dhe që, pavarësisht se u nda nga jeta shumë e re, la pas një ndikim të jashtëzakonshëm.

“Ajo iu dha jetës me gjithçka që kishte dhe e la botën një vend shumë më të mirë, edhe pse u largua nga skena tepër herët”, përfundoi ai. /GazetaExpress/