Avokati i PDK-së Faton Fetahu, duke reaguar ndaj deklaratës së sotme të kryeministrit Albin Kurti, thotë se nuk ekziston pengesë juridike që Projektligji për ndryshimin dhe plotësimin e Ligjit për Dhomat e Specializuara të shqyrtohet dhe të votohet në lexim të dytë edhe sot.

Sipas tij, pretendimi se duhet të kalojnë 72 orë ndërmjet leximit të parë dhe të dytë është juridikisht i paqëndrueshëm, pasi ky afat buron nga neni 85 i Rregullores së Kuvendit, ndërsa neni 123 mundëson shmangien nga afatet procedurale me propozim të së paku gjashtë deputetëve dhe me votën e dy të tretave të deputetëve të pranishëm.

Ai thekson se Gjykata Kushtetuese, në Aktgjykimin e 9 janarit 2026, nuk i kishte shpallur jokushtetuese ligjet e miratuara më 5 dhjetor 2024 për shkak të mosrespektimit të procedurës së përshpejtuar, por për mënyrën se si ishte zbatuar neni 123, duke zhvilluar procedurat në një kohë jashtëzakonisht të shkurtër.

Sipas tij, situata aktuale është ndryshe, pasi materialet e Projektligjit u janë shpërndarë deputetëve të shtunën, më 3 tetor, ndërsa leximi i parë është zhvilluar të hënën, më 5 tetor. Ai vlerëson se deputetët kanë pasur kohë reale për shqyrtimin e materialeve dhe se komisionet mund ta kryejnë punën e tyre gjatë ditës.

Për këtë arsye, ai konsideron se, nëse Kuvendi miraton shmangien sipas nenit 123 dhe siguron kohë efektive për shqyrtimin e amendamenteve dhe punën e komisioneve, Projektligji mund të shqyrtohet dhe të votohet në lexim të dytë edhe sot, pa pritur deri të enjten.