Një person është arrestuar në Poloni në lidhje me një plan të dyshuar për vrasjen e kryeministrit Donald Tusk dhe ministrit të Mbrojtjes, Władysław Kosiniak-Kamysz.

“Personi që kërcënonte me sulm është arrestuar”, shkroi Tusk në rrjetin social X, duke falënderuar policinë për ndërhyrjen e shpejtë dhe vendimtare.

Më herët, Ministria e Brendshme e Polonisë bëri të ditur se shërbimet e inteligjencës kishin marrë informacione për një plan të mundshëm atentati ndaj kryeministrit dhe ministrit të Mbrojtjes.

Zëdhënësja e ministrisë, Karolina Gałecka, deklaroi në një konferencë për shtyp se një raport mbi një atentat të mundshëm ndaj Tuskut dhe zëvendëskryeministrit, njëkohësisht ministër i Mbrojtjes Kombëtare, Władysław Kosiniak-Kamysz, i ishte përcjellë policisë përmes Shërbimit për Mbrojtjen e Shtetit (SOP).

Sipas saj, ministri i Brendshëm dhe ministri përgjegjës për shërbimet speciale urdhëruan marrjen e masave për trajtimin e çështjes.

Në një takim të zhvilluar për këtë rast morën pjesë zyrtarë të lartë të policisë, Shërbimit për Mbrojtjen e Shtetit dhe Agjencisë së Sigurisë së Brendshme.

Autoritetet: Kërcënimet mund të ktheheshin në veprime

Zëdhënësi i ministrit përgjegjës për shërbimet speciale, Jacek Dobrzyński, deklaroi se autoritetet po e trajtojnë çështjen me seriozitetin më të madh.

“Muaj pas muaji, vit pas viti, policia, Shërbimi për Mbrojtjen e Shtetit dhe shërbimet speciale marrin gjithnjë e më shumë kërcënime dhe mesazhe shqetësuese të llojeve të ndryshme, që lidhen me Poloninë dhe qytetarët polakë”, u shpreh ai.

Sipas Dobrzyńskit, në këtë rast ekzistonte një mundësi e konsiderueshme që kërcënimet të shndërroheshin në një sulm real.

Polonia në gatishmëri të shtuar për sigurinë

Polonia, anëtare e NATO-s dhe e Bashkimit Evropian, ndodhet në krahun lindor të të dyja organizatave dhe ka shtuar vigjilencën për çështjet e sigurisë.

Autoritetet janë në gatishmëri të shtuar pas një sërë sulmesh me thikë dhe tentativash për sulme në shkolla dhe gjimnaze që nga fillimi i vitit të ri shkollor në shtator. Në disa prej këtyre rasteve janë përfshirë të mitur ose të rinj në moshë madhore.

Të enjten, kryeministri Donald Tusk paralajmëroi për atë që e cilësoi si një “kulturë të përhapur të dhunës në botë”, duke shtuar se ky fenomen ka mbërritur edhe në Poloni. /Panorama