Trajneri i Barcelonës, Hansi Flick, ka pranuar se minutat e Lamine Yamalit duhet të menaxhohen me kujdes, por ka theksuar se nuk dëshiron t’ia ndërpresë momentin e shkëlqyer që po kalon talenti spanjoll.

Flick e ka cilësuar Yamalin si një lojtar të jashtëzakonshëm, duke nënvizuar se përveç menaxhimit të ngarkesës fizike, është e rëndësishme që ai të vazhdojë ta shijojë futbollin.

“ Nuk është e lehtë t’i përgjigjem kësaj pyetjeje, sepse Lamine është një lojtar i jashtëzakonshëm. Jam plotësisht i vetëdijshëm se duhet t’i menaxhojmë me kujdes minutat e tij, por gjëja më e rëndësishme për të është që ta shijojë futbollin”, ka thënë Flick.

“Për këtë arsye, nuk dua ta ndal këtë dinamikë pozitive në të cilën ndodhet, edhe pse jam i vetëdijshëm se duhet t’i menaxhojmë minutat dhe të ruajmë ekuilibrin e tij fizik”, ka shtuar trajneri gjerman.

Barcelona synon ta shfrytëzojë formën e shkëlqyer të 18-vjeçarit, por njëkohësisht dëshiron të shmangë mbingarkesën fizike, në mënyrë që ai të jetë në gjendje optimale gjatë gjithë sezonit.