Për herë të tretë brenda tetë muajve ka dështuar konkursi për drejtor të Agjencisë së Kosovës për Akreditim (AKA).

Së fundi, më 17 prill të këtij viti, Ministria e Administratës Publike kishte hapur konkurs për plotësimin e kësaj pozite.

Konkursi është anuluar ditë më parë për shkak se në Komisionin e Ankesave të MAP-it janë adresuar dy ankesa nga kandidatët që kanë aplikuar për drejtor të AKA-së e të cilët nuk janë ftuar fare në intervistë.

Udhëheqësi i Departamentit të komunikimit publik në MAP, Zeqir Bekolli, ka bërë të ditur për gazetën se konkursi është anuluar pasi që komisioni e ka marrë për bazë njërën nga ankesat e kandidatëve.

“Pas njoftimit të publikuar nga MAP-i për tre kandidatët më të mirë për pozitën drejtor në Agjencinë e Kosovës për Akreditim janë paraqitur dy ankesa, nga dy kandidatë që nuk kanë qenë në intervistë, Osman Shahini dhe Anton Gojani. Ankesa e Gojanit është refuzuar nga Komisioni i ankesave për pozitat e nivelit të lartë drejtues me arsyetimin se është vërtetuar se ftesa nga Sekretariati i MAP-it i është dërguar Gojani në adresën që ai e ka shkruar në aplikacionin e tij”, ka thënë Bekolli.

Ndërkaq ankesa e Shahinit, sipas tij, është pranuar nga komisioni pasi është vërtetuar se ai nuk e ka pranuar ftesën për intervistë nga Sekretariati i MAP-it dhe se ftesa është dërguar gabimisht.