Për çdo vit, në fillim të stinës së pranverës malet nëpër komuna të ndryshme të vendit pësojnë dëme të mëdha nga zjarri.

Një prej këtyre komunave është ajo e Deçanit, ku kryetari i saj, Bashkim Ramosaj, thotë se dëmet janë të mëdha, duke apeluar te qytetarët që të kenë kujdes, raporton KOHA.

Ai thotë se pos kapaciteteve të pamjaftueshme të zjarrfikësve, i gjithë fokusi është në menaxhimin e situatës aktuale me pandemi.

Për këtë, janë arrestuar dy persona në këtë komunë.

“Në rastin e Deçanit, fatmirësisht janë identifikuar dy persona të mitur, të cilët janë shoqëruar për në stacion policor dhe ndaj tyre është hapur rasti për vepër penale “zjarrvënie”, thuhet në përgjigjen e Prokurorisë Themelore të Pejës.

Banorët dyshojnë që këto zjarre janë të qëllimshme.

Mbi 300 hektarë pyje janë djegur edhe në Komunën e Skënderajt.

Kryetari i kësaj komune, Bekim Jashari, thotë se për dy muajt e fundit zjarrfikësit kanë pasur rreth 100 intervenime.

Sipas tij, nuk ka fshat që nuk është prekur nga zjarri.

Këto ditë, zjarret kanë qenë të përhapura edhe në Komunën e Vushtrrisë, Shtimes, Suharekës e Malishevës.