Artisti Driton Selmani, sot ka ndërruar flamurin kombëtar i cili gjendet në rrethin kryesor në hyrje të Prishtinës, me një flamur të “Offside-it”.

Pati reagime të shumta madje në vendin e ngjarjes kishte dalë edhe policia dhe inspekcioni.

Kryetari i Prishtinës, Shpend Ahmeti, me të kuptuar edhe arsyen e vendosjes së këtij flamuri, tha se i vjen mirë që për problemet në vend një artist e tha në këtë mënyrë.

Domethënia e flamurit, sipas tij ka kuptimin e “ofsajd”, siç e përshkruan ai, ofsajd – mbiemër, ndajfolje / në mënyrë të paligjshme përtej një linje ose zone të përshkruar; përpara topit në fillim të ose gjatë lojës.

Ai thotë se flamuri kombëtar u zëvendësua me flamurin i cili përdoret në futboll për simbolizimin e ‘pozitës jashtë loje’ ose ‘ofsajd’.

Postimi i Ahmetit:

Sot në mëngjes më lajmëruan se flamuri kombëtar te rrethi është larguar nga persona të panjohur dhe është vendosur një flamur tjetër i offside-it.

Pas daljes së inspekcionit në vend të ngjarjes është kuptuar edhe kompania e më vonë edhe qëllimi. Kjo ishte një protestë artistike e artistit Driton Semani. Më vonë e gjeta edhe shpjegimin që po e bashkangjes këtu.

Flamuri do të kthehet, por më duhet të them që disi më vjen mirë që një gjë e tille është thënë edhe në këtë mënyrë. Mora dhjetëra mesazhe nga njerëz të ndryshëm, të shqetësuar të cilët tani do ta dëgjojnë një qendrim të një artisti.

Offside!!!