Ftoj kryeministrin e Republikës së Kosovës, Albin Kurtin, dhe presidentin e Republikës së Serbisë, Aleksandar Vuçiq, që të ulen dhe të bisedojnë vetëm, pa ndërmjetësues dhe ndërhyrës të tjerë. Nuk ka nevojë për gjermanët, austriakët apo të tjerë që t’u tregoni se çfarë duhet të bëjnë dhe si duhet të jetojnë qytetarët e Kosovës dhe Serbisë.

Nëse, vërtet, Aleksandar Vuçiqi ka thënë se Kosova kurrë nuk ka qenë serbe, gjë që asnjë politikan serb nuk e ka deklaruar më parë, atëherë nuk e shoh asnjë pengesë politike të arsyeshme që këta dy liderë të takohen, të ulen, të marrin vendime dhe të zgjidhin çështjet e vështira dhe të rënda që kanë mbetur të pazgjidhura gjatë viteve. Kjo do të ishte me të vërtetë fantastike për të dy shtetet dhe për të gjithë Ballkanin, për të treguar se janë të zotë dhe të aftë për të zgjidhur problemet e pazgjidhura dhe eskalacionet politike vetë.

Dhe pse duhet që dikush tjetër të na bashkojë më mirë se ne vetë? Ne mund të kthehemi tek njëri-tjetri dhe tek vlerat e përbashkëta, traditat dhe kulturat që i kemi ndarë. Por për këtë, duhet që për fillim të lënë mënjanë egoizmin personal dhe politik, dhe në vend të urrejtjes dhe dekadencës së grumbulluar, të ndjekim rrugën evropiane të bashkëpunimit, të respektit të ndërsjellë dhe mirënjohje për diversitetin etnik, fetar dhe kombëtar.

Dhe me të vërtetë nuk e shoh asnjë arsye pse Aleksandar Vuçiq nuk do të pranojë pavarësinë e Kosovës, e cila është zgjidhur që me Marrëveshjen e Kumanovës. Këtë çështje nuk duhet ta vonojmë më dhe të mbajmë qytetarët tanë në iluzione të panevojshme. Sepse qytetarëve të Serbisë dhe Kosovës, veçanërisht serbëve të Kosovës, u duhet paqja dhe stabiliteti politik, rrugët dhe urat e hapura për një të ardhme ekonomike dhe ekzistenciale më të sigurt dhe të mirë.

Për këtë apeloj tek të dy liderët politikë dhe autoritetet e pakundërshtueshme, Kurti dhe Vuçiq, që të tregoni përgjegjësi, mençuri dhe guxim politik, të lini të kaluarën pas dhe të bëni çdo gjë të nevojshme për mirëqenien e qytetarëve tuaj, për paqe, stabilitet, të ardhme të përbashkët evropiane dhe prosperitet.

(Autori është politikan dhe gazetar; kryetar i Perspektivës Multietnike Evropiane të Kosovës)