Alo!

S’jam e lumtur. A më dëgjon?

(Dashuria e ha vetveten.)

…

(Linja Kombëtare për Ndihmë Psikologjike.)

…

PROLOG

Është hera e parë që marr krye dhe flas me një psikolog anonim.

Për arsye politike.

Dhe personale.

Pak.

…

Telefonata nr. 1

Psikologu: Mirëdita. Cili është shqetësimi juaj?

KB: Mendoj se kam humbur kontaktin me realitetin.

Psikologu: Çfarë ka ndodhur?

KB: Ka rënë Albin Kurti.

Psikologu: E kuptoj.

KB: Jo, nuk e kupton.

Psikologu: Pse?

KB: Sepse askush tjetër nuk është ngritur.

…

Psikologu: Domethënë?

KB: Domethënë ra ai.

Nuk u ngritën këta.

Psikologu: …

KB: Është si të bëhet dasmë.

Dhe të mos martohet askush.

…

Telefonata nr. 2

KB: Alo?

Psikologu: Po.

KB: Po përpiqem ta kuptoj rezultatin.

Psikologu: Çfarë nuk kuptoni?

KB: Ata që kanë humbur vota janë të parët.

Ata që kanë fituar vota kanë mbetur të tretët.

Psikologu: …

KB: Po kush fitoi?

Psikologu: …

KB: Po kush humbi?

Psikologu: …

KB: Kjo është pyetja.

…

Telefonata nr. 3

KB: Kam edhe një shqetësim.

Psikologu: Ju dëgjoj.

KB: Mendoj se Albin Kurti ka rënë

sepse…

nuk heq dorë nga njerëzit e vet.

Psikologu: Cilët njerëz?

KB: Ata që nuk do t’ua falte kurrë po të ishin të partive tjera.

…

Psikologu: Keni shembuj?

KB: Ministri e bën gruan drejtoreshë.

Këshilltarja i jep para publike burrit.

Tjetri e zbulon farefisin si degë të administratës.

Një fantazmë e vjedhjes së rrymës mbrohet me fanatizëm

sikur të ishte dëshmitar i mbrojtur.

…

Psikologu: Ndoshta janë intriga.

KB: Jo.

Problemi është se këta nuk fshihen.

…

Psikologu: Dhe kjo ju shqetëson?

KB: Jo.

Më shqetëson që Albin Kurti ende sillet sikur ne shohim vetëm atë që na tregon ai.

…

Psikologu: Çfarë mendoni se ka ndodhur?

KB: Është konsumuar miti.

Jo prej kundërshtarëve.

Prej njerëzve të vet.

…

Psikologu: Çfarë miti?

KB: Miti i pastërtisë.

Miti i superioritetit moral.

Miti se këta janë ndryshe

…

KB: Qe,

për shembull mua,

kundër Albin Kurtit kurrë nuk më kanë nxitur kundërshtarët e tij.

Por njerëzit e tij më të afërt.

Më provokojnë.

Keq.

Psikologu: Me lejen e tij?

KB: Pra, këtë rënie e ka peshqesh prej ministrave, zëvendësministrave dhe këshilltarëve të vet.

…

Psikologu: Çfarë do ta këshillonit?

KB: Të bëjë atë që bëjnë liderët kur u del tymi nga njerëzit e vet.

Psikologu: Çfarë?

KB: T’i largojë.

…

Psikologu: Si?

KB: Si Edi Rama.

Ai kur i del zëri i zi ministrit, nuk i bëhet avokat.

As nuk e çon në konferencë për shtyp.

E çon në burg.

…

Telefonata nr. 4

Psikologu: Po çfarë ju shqetëson më shumë?

KB: Shpjegimet.

Psikologu: Çfarë shpjegimesh?

KB: Të gjithë po flasin sikur kanë fituar.

…

Njëri thotë:

“Populli na dha mesazh.”

Tjetri thotë:

“Populli na dha besim.”

I treti thotë:

“Populli na dha shpresë.”

…

Psikologu: Po ku shkuan 200 mijë votues?

KB: U rritën.

Psikologu: Sa?

KB: Dy centimetra.

…

Psikologu: Domethënë?

KB: Deri dje ishin fëmijë.

Psikologu: Dhe?

KB: Shtesat ua merrnin prindërit.

…

Psikologu: Po sot?

KB: Sot janë Gjenerata Z.

…

Psikologu: Dhe?

KB: Sot nuk kërkojnë shtesa.

Kërkojnë pagë.

…

Psikologu: Ku janë?

KB: Në det.

Në male.

Në festivale.

Në palestër.

Në meditim.

Në internet.

Në dhomë.

Kudo.

Veç në vendvotime jo.

…

Psikologu: Pse?

KB: Sepse prindërit votonin me shpresë.

Këta duan fakte.

Jo premtime.

…

Psikologu: Kjo është shumë cinike.

KB: Jo.

Cinike është kur mendon se një gjeneratë që s’mund të blejë banesë, do të emocionohet nga:

“Krisi pushka.

Ushtoi mali.”

…

Telefonata nr. 5

Psikologu: Po çfarë ju huton më shumë?

KB: Vetëbesimi.

Psikologu: I kujt?

KB: I Albin Kurtit.

…

Psikologu: Pse?

KB: Sillet sikur nuk i duhet askush.

Ka qejf: I vetëm, kundër të gjithëve.

Shumë.

…

Psikologu: Dhe?

KB: Plakat e shekullit të kaluar që janë lutur:

“Zot, mos më bëj myftiaç për askënd”,

zakonisht kanë përfunduar nevojtare.

…

Psikologu: …

KB: Ky është momenti kur dashuria fillon ta hajë vetveten.

…

Sepse lideri që për vite ka thënë:

“Unë jam ndryshe”,

fillon të besojë:

“Vetëm unë kam të drejtë.”

…

Dhe kur arrin në atë pikë,

fillon të humbësh edhe njerëzit e tu.

…

Telefonata nr. 6

Pa Alo.

KB: Edhe kësaj radhe më shumë votuan të moshuarit.

Psikologu: Që do të thotë?

KB: Shpresa është plakur.

…

Psikologu: Po të rinjtë?

KB: Të rinjtë nuk jetojnë më me shpresë.

Jetojnë me qira.

…

Psikologu: Çfarë do të thotë kjo?

KB: Do të thotë se politika po hyn në një epokë ku nuk mjafton të jesh hero.

Duhet të jesh i dobishëm.

Dhe: i qetë.

…

Telefonata e fundit

KB: Alo!

Psikologu: Çfarë shqetësimi ke tani?

KB: Pas mesnate?

Psikologu: Po.

KB: Pse Albin Kurti i josh dhe pastaj i gjuan bashkëpunëtorët e jashtëm?

Psikologu: …

KB: Alo?

Psikologu: …

KB: Më dëgjon?

Psikologu: Jo.

KB: Pse?

Psikologu: Sepse për këtë pyetje e kam telefonuar edhe unë Linjën Kombëtare për Ndihmë Psikologjike.

…

EPILOG

Raporti përfundimtar i institucionit

Diagnoza:

Zonja nuk vuan nga depresioni.

Vuan nga kontakti i zgjatur me realitetin.

…

Rekomandimi:

Të mos lejohet përdorimi i fjalëve:

fitore historike,

mesazh i qartë,

besim qytetar,

moment i ri,

vullnet i popullit,

sepse mund të shkaktojnë episode të forta…

satirike.

…

P.S.

Shënim sekret i institucionit:

E dëmtuara vazhdon të insistojë se:

“Nëse bie i pari dhe nuk ngrihet i dyti, problemi është i treti.”

…

AUTOKRITIKË

Pastaj ndodhi telefonata private mes Psikologut dhe KB-së.

…

Psikologu: Kim, po më trego drejt.

KB: Fol.

Psikologu: Kush fitoi?

KB: Heshtje.

Psikologu: Kim?

KB: Po mendoj.

Psikologu: Dhe?

KB: Unë.