Ambasadori rus paralajmëron përshkallëzimin e luftës në Ukrainë pas vizitës së Zelenskyt në ShBA

Prishtinë | 22 Dhj 2022 | 08:42 | Nga Ekonomia Online

Ambasadori rus në SHBA, Anatoly Antonov, deklaroi se vizita e Volodymyr Zelenskyt në Uashington tregoi se as Shtetet e Bashkuara dhe as presidenti ukrainas nuk janë “gati për paqe”, shkruan CNN.

Komentet e tij erdhën pasi Zelensky mbajti një fjalim historik nga Kapitoli i SHBA-së, duke shprehur mirënjohjen për mbështetjen amerikane në luftimin e agresionit rus që nga fillimi i luftës – dhe duke kërkuar më shumë nga kjo.

“Deklaratat pajtuese të administratës Biden për mungesën e synimit për të filluar një konfrontim me Rusinë janë vetëm fjalë boshe”, tha ambasadori Antonov në një deklaratë të shpërndarë nga Ambasada Ruse që dënoi atë që ai e përshkroi si “udhëtim të stilit të Hollivudit” të Zelenskyt.

“Ajo që në thelb u njoftua për duartrokitje dhe buzëqeshje sarkastike, ishte nevoja për të vazhduar ‘luftën me prokurë’ kundër vendit tonë. Deri në një fitore të plotë ndaj nesh”, shtoi Antonov.

Duke folur së bashku me Zelenskyn të mërkurën, Presidenti Joe Biden njoftoi se SHBA do t’i dërgojë Kievit një sistem të mbrojtjes raketore Patriot si pjesë e një pakete shtesë ndihme prej 1.8 miliardë dollarësh për Ukrainën.

Antonov tha se njoftimi i Biden erdhi pavarësisht se Rusia paralajmëroi SHBA-në kundër ofrimit të këtij sistemi në Ukrainë. “Unë mendoj se të gjithë e kuptojnë shumë mirë se me çfarë fati mund të përballet personeli, i cili menaxhon këto komplekse në territorin e Ukrainës”, tha ai.

Ambasadori rus paralajmëroi gjithashtu se përfshirja e SHBA-së në Ukrainë mund të çojë në intensifikimin e konfliktit.

“Veprimet provokuese të SHBA-së po çojnë vazhdimisht në një përshkallëzim, pasojat e të cilës as nuk mund të imagjinohen”, përfundoi Antonov.

Të ngjashme