Carlo Ancelotti është shfaqur sot në qendrën stërvitore të Real Madridit, “Valdebebas”, teksa skuadra madrilene po përgatitet për ndeshjen e La Ligës ndaj Real Betisit.

Trajneri italian i Brazilit e ka vizituar ish-klubin e tij vetëm një ditë para përballjes së Real Madridit me Betisin.

Sipas “Marca”, Ancelotti e ka përshëndetur të gjithë skuadrën përpara fillimit të stërvitjes, ndërsa e ka pasur një pritje të veçantë për tre futbollistë brazilianë: Endrick, Rodrygo dhe Éder Militão, përcjell “Gazeta Express”.

Vizita e Ancelottit nuk ishte thjesht një ndalesë e shkurtër në “Valdebebas”. Trajneri italian dëshironte ta shihte nga afër gjendjen fizike të Endrick, Rodrygo dhe Militão, të cilët aktualisht po punojnë veçmas nga pjesa tjetër e grupit për ta përfunduar rikuperimin e tyre.

Të tre janë futbollistë të rëndësishëm për Brazilin, kombëtare që drejtohet nga Ancelotti.

Për këtë arsye, trajneri italian ka dashur të marrë personalisht informacion mbi gjendjen e tyre, veçanërisht disa javë para grumbullimit të ardhshëm të kombëtares.

Endrick, Rodrygo dhe Militão kanë kaluar periudha të ndryshme me probleme fizike dhe vazhdojnë të punojnë për rikthimin e plotë në dispozicion të ekipit.

José Mourinho, trajner aktual i Real Madridit, ka dalë personalisht për ta përshëndetur Ancelottin dhe ka ecur bashkë me të drejt fushës së stërvitjes për t’u takuar me lojtarët.

Marrëdhënia mes dy trajnerëve shkon përtej një raporti thjesht profesional. Mourinho dhe Ancelotti kanë një respekt dhe miqësi të veçantë, ndërsa trajneri portugez e ka përmendur edhe së fundmi italianin gjatë një konference për shtyp kur u pyet për situatën e Endrick.

Kjo marrëdhënie e mirë mes tyre pritet të ndihmojë edhe në komunikimin mes Real Madridit dhe kombëtares braziliane.

Ancelotti, i cili e njeh shumë mirë ambientin e “Los Blancos” pas viteve të kaluara në Madrid, e shfrytëzoi vizitën për t’u takuar me ish-kolegët dhe për ta parë nga afër progresin e lojtarëve brazilianë.

Vizita e italianit në “Valdebebas” vjen në një moment të rëndësishëm pasi Brazili po përgatitet për ciklin e ardhshëm ndërkombëtar dhe Ancelotti dëshiron të ketë në dispozicion sa më shumë nga lojtarët e tij kryesorë.