Policia e Kosovës ka ndaluar, të enjten, dy shtetas të huaj në rajonin e Rahovecit, me dyshimin se kanë “kaluar kufirin në mënyrë ilegale”.

Komandanti rajonal i Policisë së Kosovës për komunën e Prizrenit, Nexhi Krasniqi, i tha Radios Evropa e Lirë se të ndaluarit “një mashkull dhe një femër janë gazetarë: njëri shtetas i Ukrainës dhe tjetra gazetare nga Rusia”, dhe shoferi i tyre, një pjesëtar i komunitetit serb nga komuna e Shtërpcës në Kosovë.

Krasniqi tha se “të ndaluarit kanë hyrë në Kosovë në pikën kufitare në Jarinë, në mënyrë ilegale”. Ai ka thënë se të ndaluarit kanë thënë “se askush nuk iu ka kërkuar dokumentet e identifikimit gjatë hyrjes në Kosovë”.

Komandanti i Policisë në Prizren tha se “të ndaluarit janë shëtitur nëpër Kosovë, duke qëndruar fillimisht në Shtërpcë dhe më vonë në Prizren. Pas kësaj janë kthyer në Rahovec dhe janë ndaluar nga Policia e Kosovës”.

Gjatë ditës së premte, një agjenci ruse e lajmeve, Sputnik, duke cituar kryeredaktorin e agjencisë së lajmeve News Front, bëri të ditur se dy gazetarë të redaksisë në gjuhën serbe, “shtetas rusë janë arrestuar në Hoçë të Madhe të Rahovecit, gjatë xhirimeve për një rrëfim mbi kishat ortodokse në Kosovë dhe bashkëjetesën e shqiptarëve dhe serbëve në rajon”.

Policia në Kosovë tha se autoritetet kufitare po e trajtojnë rastin “ndërkohë që personat e ndaluar po mbahen në qendrën për të huaj deri në marrjen e vendimit për largimin e tyre nga Kosova”.

Policia tha se “të gjitha vendimet rreth shtetasve të huaj që kanë qëndruar ilegalisht në Kosovë do të ndërmerren në përputhje me ligjet e aplikueshme në fuqi në Kosovë”.