Subjektet politike nuk po shprehin sa duhet interesim për të paguar gjobat që u janë shqiptuar për raundin e parë të zgjedhjeve lokale të 22 tetorit. Nga 219 mijë e 450 euro gjoba sa janë shqiptuar ndaj tyre nga Paneli Zgjedhor për Ankesa dhe Parashtresa, subjektet politike kanë paguar vetëm 54 mijë euro.

Kështu ka thënë për arbresh.info kryesuesi i sekretariatit në Panelin Zgjedhor për Ankesa dhe Parashtresa, Mulë Desku.

Subjektet politike të cilat janë gjobitur dhe nuk kanë paguar ende asnjë cent janë: Lidhja Demokratike e Kosovës me gjobë në vlerë prej 70 mijë e 750 euro, Lëvizja Vetëvendosje me gjobë prej 23 mijë e 100 euro, Aleanca për Ardhmërinë e Kosovë me gjobë prej 14 mijë e 700 euro dhe disa parti të tjera të vogla e nga minoritetet.

Sipas Deskut subjektet politike të cilat kanë paguar një pjesë të gjobës janë PDK-ja, AKR-ja, dhe KDTP-ja.

Ndërkaq, subjektet politike që kanë paguar në tërësi gjobat janë Lista Serbe, PDAK dhe PLE.

“LDK= 70,750.00 €,

PDK= 26,150.00 €. Ka paguar = 1,350.00 €, Pa paguar edhe 24,800.00 €.

LVV= 23,100.00 €,

AAK= 14,700.00 €,

AKR= 20,050.00 €. Ka paguar 11,300.00 €. Pa paguar edhe 8,750.00 €

ALTERNATIVA= 12,950.00 €,

NISMA= 6,950.00 €,

KDTP= 2,450.00 €, Ka paguar 2,250.00 €. Pa paguar edhe 200.00 €

PDAK= 250.00 €, Ka paguar ne tersi gjobën 250.00 €

PAI= 250.00 €,

LEV.PËR BASHKIM- LB= 250.00 €.

SERBE= 38,550.00 €. Ka paguar në tersi gjobat 38,550.00 €
PLE= 300.00 € Ka paguar ne tersi gjobën 300.00 €

KTAP= 2,200.00 €

GISDP. O.Ivanovic= 500.00 €

Vlera e përgjithshme e gjobave siç bënë të ditur Desku është 219 mijë e 450 euro.

Sipas tij, pasi që PZAP-ja, ka shqiptuar gjoba ndaj subjekteve politike këto të fundit kanë paraqitur disa ankesa në Gjykatën Supreme por se kjo e fundit ka vërtetuar vendimet e PZAP-it.

“Për gjobat e shqiptuara nga PZAP-i ndaj subjekteve politike janë paraqitur disa ankesa ne Gjykatën Supreme , por te gjitha ankesat e parashtruara ndaj vendimeve te PZAP-it ne këtë Gjykate lidhur me gjobat e shqiptuara janë refuzuar nga Gjykata Supreme e Kosovës, respektivisht janë vërtetuar vendimet e PZAP-i”, ka thënë ai.

Zgjedhjet Lokale janë mbajtur më 22 tetor, ndërsa për komunat që kanë shkuar në balotazh zgjedhjet do të mbahen më 19 nëntor.