Autoritetet venezueliane thonë se kanë arrestuar 14 persona të tjerë në lidhje me përpjekjen e dyshuar për të vrarë Presidentin e vendit, Nicolas Maduro.

Ndër të ndaluarit janë një gjeneral dhe një kolonel nga Garda Kombëtare.

Presidenti Maduro ka akuzuar politikanët e opozitës dhe Kolumbinë fqinje për komplotimin për ta vrarë atë me një sulm droni gjatë një parade ushtarake në kryeqytetin Karakas, më 4 gusht.

Kryeprokurori Tarek Saab tha se 12 persona të tjerë ishin deri tani në paraburgim. Venezuela ka lëshuar 27 urdhër-arresti për atentatin ndaj Maduros. Të arrestuarit e mëparshëm përfshijnë një ligjvënës dhe disa të rinj.

Autoritetet venezueliane thonë se të dyshuarit e tjerë janë ende të lirë dhe fshihen në Kolumbi dhe Shtetet e Bashkuara të Amerikës. Maduro akuzoi Kolumbinë dhe elementë brenda ShBA-së për komplot për ta vrarë atë.

Qeveria kolumbiane thotë se nuk ka bazë për akuzat e Maduros, ndërsa Këshilltari i Sigurisë Kombëtare i ShBA, John Bolton mohoi çdo përfshirje amerikane në incident.