Atletico Madridi ka arritur ta rikthejë rezultatin ndaj Barcelonës 3-2 në ndeshjen gjysmëfinale të Superkupës së Spanjës, duke iu bashkuar Real Madridit në finale.
Pjesa e parë e ndeshjes u karakterizua me dominim të katalunasve, të cilët patën posedimin dhe rastet, ndërsa Atletico tentonte me kundërsulmeve.
Megjithatë, edhe pas 45 minutave lojë skuadrat nuk arritën të shënonin.
Në pjesën e dytë, u zhvillua lojë më e hapur dhe këtë e tregojnë golat e shpejtë dhe të shumtë.
Atletico ishte e para që gjeti golin në minutën e 46-të nga Koke, i cili shënoi pas 18 sekondave në fushën e lojës.
Barcelona arriti të kthehet në lojë duke barazuar 1-1 me anë të Lionel Messit (51’) që shënoi një gol të bukur, ndërsa Antoine Griezmann (62’) kaloi Barcelonën në epërsi 2-1.
Klubi katalunas gjeti golin edhe në minutën e 74-të me Gerard Pique, por ky gol u anulua nga VAR-i dhe nga ky moment erdhi rikthimi i Los Cholchoneros.
Skuadra e Diego Simeones arriti të barazojë rezultatin me anë të Alvaro Moratas (82’) nga penalltia për 2-2, ndërsa Angel Correa (86’) shënoi për 2-3 pas një kundërsulmi.
Deri në fund të ndeshjes, Barcelona tentoi disa herë të barazojë rezultatin, por pa pasur sukses.
Në finale, Atletico do të përballet me Real Madridin, i cili mposhti 3-1 Valencian në gjysmëfinalen tjetër të Superkupës së Spanjës.