Nenad Rashiq thotë se djali i tij u sulmua për motive politike, dërgohen në mbajtje 7 të dyshuar.

E hëna ishte vetëm ditë normale e shkollës për Nikolla Rashiq që ndjek mësimet në Lapnasellë të Graçanicës.

Por, nuk përfundoi kështu.

Pasi kreu orarin mësimor, djali i politikanit serb Nenad Rashiq është pritur nga një grup prej 30 personave.

E edhe në pamjet që ka siguruar T7, shihet se rrahja ishte brutale.

Dëshmitarët që e panë nga afër ngjarjen e cilësuan këtë rrahje si përleshje adoleshentësh.

Ata mohuan se ngjarje të tilla ndodhin shpesh në këtë anë.

Por, ndryshe po thotë Nenad Rashiq, babai i Nikollës.

Ky i fundit pas rastit ishte detyruar që ta dërgojë djalin e tij në Spitalin e Kirurgjisë në Graçanicë.

Lëndimet që djali i tij i mori nga kjo rrahje, thotë se janë thyerje të dhëmbëve e gjakderdhje të mëdha nga lëndimet.

Tutje, Rashiq shtoi se sulmuesit kanë pasur me vete thika, çekiq dhe boksa të hekurit.

Të gjitha këto ai i tha në një konferencë për media që kishte thirrur të martën.

Rashiq, ngreh dyshimet se rrahja ka qenë e planifikuar dhe ka ndodhur për qëllime politike.

Megjithatë ai thotë se i ka lënë organeve të rastit të merren me rastin.

Por, se kjo gjë ishte e planifikuar po e mohon dikush tjetër.
Babai i njërit nga pjesëmarrësit në përleshje, Ilija Markoviq, thotë se konflikti ishte nisur nga vetë Nikolla Rashiq dhe u bë mes dy grupeve.

Ai shton se djali i tij Markoviq, 17 vjecar u rrah nga shokët e Nikollës dhe është në spital duke marr trajtim për dëmtim të hundës.

E dyshimet se kjo zënkë kishte nisur një ditë më herët i thotë vetë ai.

Duke treguar edhe disa mesazhe që djali i tij i pranoi në rrjete sociale.

Megjithatë i pyetur nga T7 për gjithë këto deklarata politikani serb Nenad Rashiq tha se nuk qëndrojnë.

Për këtë rast, Policia e Kosovës bën të ditur e ka arrestuar 7 të dyshuar.

Ndërkaq tashmë është bërë kërkesë nga ana e Prokurorisë drejtuar Gjykatësit të Procedurës Paraprake për caktim të masës së paraburgimit për të dyshuarit.