Babai i Noizyt, Bashkim Rajku, ka komentuar përleshjen e armatosur në Prishtinë, ku mbeti i plagosur djali i tij.

“Noizy është shëndoshë e mirë si kokrra e mollës. Është gjuajtur me një pistoletë kalibër shumë të vogël, dhe ka marrë një gërvishtje të lehtë në këmbë.

Dhe nuk është aspak e vërtetë që është plagosur në kokë. Noizy të martën në mbrëmje ka përformuar në Ferizaj me program të plotë. Madje salla ku është mbajtur koncerti ka qenë më plot se herët e tjera”, ka thënë ai për Summer Pages të Gazeta Shqiptare.

Më tej, Rajku ka treguar se lajmin e sherrit e ka marrë vesh nga mediat dhe menjëherë është nisur për në Kosovë, ku dhe ka takuar të birin e plagosur në spital. Si një nga personat më të afërt me të, ai tregon se si e gjeti Rigelsin në Kosovë.

“Kur e pashë, ishte duke qeshur. ‘S’kam asgjë’, më tha, ishte fare i qetë. Dhe me të vërtetë nuk kishte asgjë; sapo mori mjekimin doli menjëherë nga spitali”, ka shtuar babai i këngëtarit të mirënjohur.
Sipas Bashkimit, reperët nga Kosova i kanë sulmuar ata nga Shqipëria sapo i kanë parë, me qëllim poshtërimin e reperit. Ai ka thënë se ata kanë përdorur armë, ndërsa Noizy së bashku me pjesëtarët e tjerë të OTR kanë qenë të paarmatosur.

Mes gjithë kësaj historie ai nuk harron pa përmendur edhe policët e Kosovës, që sipas tij, kanë qenë të paaftë për të mbrojtur Noizyn, ndaj dhe atij i është dashur të vetëmbrohet.

Kujtojmë që nga përleshja në Prishtinë, Noizy dhe Varrosi mbetën të plagosur, ndërsa Cozman dhe një mik i tij u arrestuan.