Kështu ka deklaruar nënkryetari i AKR-së, Agim Bahtiri. Ai në një deklaratë për Gazetën Express, ka thënë se AKR nuk ka biseduar asnjëherë me zyrtarë të koalicionit PAN rreth ndonjë marrëveshje të mundshme në mes të këtyre dy subjekteve. Thotë se deri më datën 7 shtator do të presin se si do reagojnë subjektet politike ndaj ofertës së AKR-së.

“Kërkesa e AKR-së, gjithherë ka qenë se i ka ftuar të gjithë që të bëjmë një koalicion të përbashkët, ta bëjmë një qeveri teknike për dy vite dhe t’i zgjedhim të gjitha problemet për t’i çuar çështjet përpara. Kjo duhet të rezultojë pozitivisht tek të gjithë, t’i lënë teket e tyre dhe interesat personale, dhe t’i kthehen shtetit, ngase vendi do të ketë qeveri. Apeli jonë është ende në fuqi”, ka deklaruar ati.

Tutje ai është shprehur se AKR nuk do të bëj koalicion me PAN e as ndonjë parti tjetër.
E ndërkohë Bahtiri ka folur edhe për deklaratat e themelueses së Alternativës, Mimoza Kusarit, e cila ka thënë se AKR nuk ka arritur ndonjë marrëveshje me PAN për bashkë qeverisje. Bahtiri ka thënë se përveç strukturave të partisë askush tjetër nuk mund të flas për AKR-në. Thotë se ajo nuk është e thirrur që të flasë në emër të partisë së Pacollit.

“Unë e respektoj zonjën Kusari dhe nuk e di se në cilin element ka fol, megjithatë ajo nuk është e thirrur që të flas në emër të AKR-së. Ajo mund të jap mendimin e saj por jo në emër të AKR-së. Në emër të AKR-së ka njerëz që flasin”, ka theksuar tutje Bahtiri.