Ministrja e Arsimit, Shkencës, Teknologjisë dhe Inovacionit, Hykmete Bajrami, ka pritur nënkryetarin e Parlamentit Europian, Rainer Wieland, të shoqëruar nga një delegacion i përbërë nga udhëheqës të institucioneve të ndryshme gjermane, me të cilët ka biseduar për bashkëpunimin në të gjitha nivelet e arsimit.

Wieland theksoi mbështetjen që do ta ketë edhe më tutje Kosova dhe MAShTI, në mënyrë që fëmijëve dhe të rinjve t’iu ofrohet arsim cilësor, transmeton Klan Kosova.

Ai theksoi se është e rëndësishme që të rinjtë së pari të marrin shkollim të mirë dhe më pas ata të jenë në një treg të punës pa korrupsion dhe nepotizëm.

Bajrami falënderoi Gjermaninë për ndihmën që i ka dhënë Kosovës në faza të ndryshme dhe në të gjithë sektorët, e veçanërisht në sektorin e arsimit, ku mbështetja ka qenë dhe mbetet shumë e rëndësishme.

Ministrja foli për gjendjen në arsim dhe për programin qeveritar, i cili e ka prioritet përmirësimin e gjendjes në arsim, prandaj theksoi nevojën e mbështetjes së partnerëve zhvillimorë. Ajo u zotua se projektet që janë duke u realizuar në arsim, por edhe ato që do të fillojnë, do të implementohen pa pengesa dhe vonesa nga ana e MAShTI-t.

Në këtë takim, u biseduan shumë tema konkrete, ku Gjermania mund ta mbështesë Kosovën, si politikat komunale në arsim, edukimi në fushën e administratës publike, shkëmbimi i nxënësve dhe tema të tjera.