Me prezencën e shumë anëtarëve të Shoqatës “Çamëria”, këtë të shtunë është mbajtur Kuvendi i III-të i shoqatës, derisa kryetari i saj u zgjodh Bashkim Morina, raporton Ekonomia Online.

Të pranishëm ishin anëtarë të shoqatës nga diaspora, Lugina e Shqipëria.

Morina u zgjodh me vota unanime për një mandat katër-vjeçar, i cili premtoi të punojë më shumë për çështjen çame.

“Jemi në prag të përvjetorit të dhimbjes të masakrës në Çamëri që çdo shqiptarë e ndjen thellë në zemrën e tyre. Shteti grek i cili edhe pas 80 vitesh ende e mban në fuqi ligjin e luftës dhe në emër të këtij ligji, familjarët nuk i lejon të ngrejë një varrë dëshmorëve ku mund të dërgojnë një kurorë me lule që të mund të bëjnë disa lutje për familjarët e tyre. Megjithatë unë besoj se ka ardhë koha e Çamërisë”, tha kryetari i zgjedhur i shoqatës.

Aty u kërkua që Çamëria të bashkohet me Shqipërinë, derisa kritikuan institucionet e Shqipërisë dhe Kosovës, se nuk po bëjnë sa duhet për këtë çështje.

Aty u kërkua që mos të përdoret termi bashkim Kombëtar por Ribashkim Kombëtar.

Kryetari i nderit të shoqatës, Nexhmi Muçiqi, foli për idealin e tyre. Ai pati kritika ndaj institucioneve të dyja vende që nuk po punojnë për bashkimin e trojeve shqiptare.  

“Ne nuk kemi dashur t’i dëmtojmë idealet e Kosovës por të ecim paralelisht për të mirë të Kosovës. Në një mënyrë edhe jemi bërë si shoqëri civile dhe i kemi kritikuar institucionet. Kur ndalemi se çfarë po bëjnë institucionet në Kosovë dhe Shqipëri, është më rëndësi që ose nuk po duan atë që e kanë obligim ose po na injorojnë totalisht. Unë jam i irrituar me vizitën e ministrit grek, i cili kërkoi që mos të hapim çështje që nuk ekzistojnë. Cila çështje nuk ekziston? dhe unë nga Prishtina dua ta ngriti zërin se edhe Serbia për 120 vite Serbia u mundua ta mohojë ekzistencën tonë por nuk i doli”, tha ai.

Kryetari i shoqatës Çamëria në Tiranë, Lilian Idrizaj, tha se me ndihmën e gjithë shqiptarëve, do të jetësohet bashkimi i trojeve shqiptarëve.

“Ne që nga sot do të bashkëdrejtojmë të gjitha shoqatat. Me të vërtetë jam i emocionuar për këtë takim kaq patriotik dhe kaq shpresëdhënës që kanë me mbajte gjallë çështjen Çame dhe me ndihmën e të gjithëve do ta jetësojmë deri në fund bashkimin e trojeve shqiptare”, tha ai.

Lumturie Hasa aktiviste e shoqatës dhe profesoreshë, foli për rëndësinë e shoqatës. Ajo tha se ka marrë bekimin e babait të saj për bashkimin e trojeve shqiptare.

“Ndjenja atdhetarisë dhe patriotizmi i shoqatës është një vepër shumë e madhe për t’u bashkuar me fjalët. Para se të nisesha e takova babain dhe i thash që po shkoj për Kosovë, dhe i thash se vëllezërit kosovarë që po mundohen ta zgjidhin çështjen qamë. Ai u ngazëlluar dhe më uroi fat”, citoi ajo fjalët e babait të saj.

Aziz Bytyqi bashkëthemelues i Shoqatës, tha

“Sot po e mbajmë këtë kuvend të shoqatës ku e themeluam nga vitit 2016. Unë bashkë me Nexhmi Muqiqin e themeluam shoqatën e cila na shtyri çështja çame e shtypur dhe që nga ditët e para e angazhuam vullnetarisht, fillimisht me themelimin e degëve në Kosovë e më pastaj u aktivizuam e bëmë shumë punë falë degëve në Kosovë e jashtë saj. Prandaj në Kosovë dhe me degët tjera do ta bëjmë të pamundur që qëllimi ynë të bëhet realitet siç ishte dikur, për një Shqipëri të Madhe”, tha ai.

Në fund, u zgjodhën edhe strukturat e shoqatës, ku nënkryetari i parë u zgjodh Xheladin Tafallari, Bajram Rama nënkryetar, Isuf Kuqi sekretar dhe Lumtururie Ferizi kryetare i fondacionit në Kosovë.

Për fund, shoqata ndau mirënjohje për anëtarët dhe kontribuuesit.