Komisioni Evropian ka njoftuar të enjten se ka arritur marrëveshje për furnizim me vaksinën për COVID-19 të Johnson & Johnson. Është arritur marrëveshje për vaksina për 400 milionë personave, shkruan agjencia Reuters.

Kjo është marrëveshja e tretë e nënshkruar nga BE-ja me prodhues të vaksinave të COVID-19 pas marrëveshjeve me AstraZeneca e Sanofi.

Sipas kushteve të marrëveshjes, 27 shtetet anëtare të BE-së do të jenë në gjendje të marrin deri 400 milionë doza të vaksinës potenciale pasi ajo autorizohet si e sigurt dhe efikas nga rregullatori shëndetësor i BE-së.

“Kontrata lejon shtetet anëtare të blejnë vaksina për 200 milionë persona. Po ashtu do të kenë mundësi të blejnë vaksina edhe për 200 milionë tjerë”, është thënë nga KE-ja.

Për të siguruar vaksinat BE-ja ka bërë një parapagim te Johnson & Johnson. Nuk është përmendur shuma e paguar.

Po ashtu është arritur marrëveshje me Gilead Science të enjten për shitjen e 500 mijë seancave me ilaçin anti-viral remdesivir.