Ish-këshilltari për Siguri Shtetërore i presidentit Trump, John Bolton, është kërcënuar me padi, nëse komitetet e Kongresit lëshojnë thirrje zyrtare për ta detyruar të dëshmojë në hetimet e tyre për shkarkimin e të parit të SHBA-së, ka bërë të ditur të enjten një komitet i Dhomës së Përfaqësuesve.

Boltonit i është kërkuar të paraqitet për të dëshmuar të enjten, por nuk e ka bërë një gjë të tillë.

Avokati i tij kishte thënë qysh më parë se ai nuk do të dëshmonte vullnetarisht.

“Këshilltari i tij na ka informuar se për dallim prej tre shërbyesve të tjerë të përkushtuar civilë, që kanë punuar me të në Këshillin Kombëtar të Sigurisë (NSC) dhe të cilët i kanë përfillur thirrjet zyrtare për dëshmi, Boltoni do të na dërgonte në gjykatë po t’i dërgonim një thirrje të tillë”, ka thënë një zyrtar i komitetit për Inteligjencë në Dhomën e Përfaqësuesve, shkruan Reuters, transmeton “Koha Ditore”.

Disa orë pas dështimit të Boltonit për t’u paraqitur për dëshmi, gazeta amerikane “Washington Post” ka raportuar se ai do të ishte i gatshëm të dëshmonte në rast se një gjykatë federale e mbështet ftesën e Kongresit, për ta detyruar atë të japë dëshminë.

Zyra e Boltonit dhe avokati i tij nuk i janë përgjigjur kërkesës për koment.

Çështja nëse Kongresi e ka të drejtën që t’iu bëjë ftesë për dëshmi zyrtarëve të afërt me presidentin ka ndezur debat në kuadër të hetimeve për shkarkim.

Trumpi dhe shumë republikanë në Kongres kanë mohuar keqbërjen dhe e kanë hedhur poshtë hetimin, duke e quajtur “ndjekje shtrigash” e ndërmarrë prej një partie, që synon të sprapsë fitoren e beftë zgjedhore të 2016-s të magnatit të patundshmërive.

Ata kanë udhëzuar zyrtarët e administratës që të mos bashkëpunojnë, duke nxitur Komitetin e Dhomës së Përfaqësuesve për Punë të Jashtme, atë për Mbikëqyrje dhe atë të Inteligjencës që të lëshojnë thirrje zyrtare, për ta detyruar dëshmimin e tyre.

Demokratët kanë thënë se janë duke e ushtruar të drejtën e tyre, në pajtim me Kushtetutën amerikane, për hetimin e keqbërjes potenciale prej një presidenti.