Renato Augusto ka shënuar gol për Brazilin, në minutën e 76-të, duke dhënë shpresa për një rikthim. Por kjo nuk ka ndodhur.

Ekipi belg është gjysmëfinalisti i dytë, pasi shënoi dy gola në pjesën e parë kundër brazilianëve.

Golat janë shënuar nga ana e Fernandinho (autogol) dhe De Bruyne.

Belgjika kalon për herë të parë në histori në gjysmëfinale të një botërori.

Pas eliminimit të Brazilit dhe të Uruguajit sot më herët nga Franca, në Botërorin Rusia mbeten vetëm ekipe evropiane.

Gjigantët i “përpiu” Kazani në Botëror!

Pa dyshim, Botërori Rusi 2018 mund të cilësohet si Botërori i surprizave, i cili nisi që me eliminimin e Holandës dhe Italisë në fazën eliminatore të tij.

Por jo vetëm kaq, surprizat ishin shumë herë më të mëdha me fazën e grupeve. Kampionët në fuqi të Gjermanisë ranë që pas 3 ndeshjeve, duke e mbyllur Botërorin në vendin e fundit në grup vetëm me një fitore.

Pas Gjermanisë ishte radha e Argjentinës së Lionel Messit, të cilët edhe pse me shumë pretendime zhvilluan një fazë grupesh tejet të keqe edhe pse arritën ta kalojnë me fat atë. Por vetëm kaq edhe për ta, pasi menjëherë në fazën e ardhme ishte Franca që i eliminoi me rezultatin 4-3.

Por sërish, surprizat nuk mbyllen këtu. Pesë herë kampionët e botës, Brazili u eliminua mbrëmjen e sotme në çerekfinale nga Belgjika, pasi u mund 1-2.

E ajo që i lidh të gjitha të mëdhatë në këtë Botëror është pikërisht “Kazan Arena”, stadiumi ku ata ranë e u larguan më pas mes lotësh.

Tashmë, nga të mëdhatë kanë mbetur Franca dhe Anglia, të cilat duket se e “kanë të hapur rrugën” për në finale pasi kjo ishte ndeshja e fundit e luajtur në “Kazan Arena”.