Një pjesë e Shkollës Fillore e Mesme e Ulët “Ilir Konushefci” në fshatin Llugë të Podujevës sot në mëngjes është përfshirë nga zjarri, i cili ka shkaktuar dëme në këtë objekt.

Kryetari i kësaj komune,  Shpejtim Bulliqi, ka vizituar sot shkollën e fshatit Llugë, për t’u njoftuar nga afër me gjendjen e objektit dhe dëmet e shkaktuara si pasojë e zjarrit.

Ai tha së bazuar në informacioneve të para zjarri në fillim ka përfshirë kulmin e objektit dhe falë intervenimit të zjarrfikësve dhe policisë zjarri është lokalizuar.

“Fatmirësisht zjarri nuk ka shkaktuar dëme në njerëz. Janë dëmtuar dy dhoma mësimi dhe tri banjo” tha Bulliqi, përmes një postimi në Facebook.

Lidhur me shkaktarin e zjarrit do të deklarohen organet kompetente, të cilat kanë dalë në vendin e ngjarjes.

Ai njoftoi poashtu se Komuna do të intervenojë në kohën sa më shpejtë për sanimin e dëmeve të shkaktuara, ndërsa deri në krijimin e kushteve për mësim në objekt shkollor, për nxënësit e shkollës “Ilir Konushefci” mësimi do të zhvillohet online.