Dardan Gashi, ministër i Diasporës dhe Investimeve Strategjike dhe njëkohësisht zv.kryeministër në Qeverinë e Kosovës dhe Pandeli Majko, ministër i Shtetit për Diasporën në Qeverinë e Shqipërisë, kanë nisur sot në objektin e Konsulatës së Republikës së Kosovës takimet e përbashkëta, duke filluar me temën e mësimit plotësues të gjuhës shqipe në ShBA.

Majko dhe Gashi së bashku takuan drejtorët e shkollave shqipe në qytetin e New Yorkut me të cilët diskutuan implementimin e marrëveshjeve ndërshtetërore të nënshkruara si në fushën e bashkëpunimit me dhe për diasporën ashtu edhe marrëveshjen konkrete për mësimin plotësues të gjuhës shqipe.

“I përulemi punës suaj”, tha me këtë rast ministri Majko i cili po ashtu në vizitën e tij të parë në cilësi të Ministrit të Diasporës në ShBA, kërkoi nga drejtorët e shkollave një koordinim më të mirë në të ardhmen.

“Shkolla verore është një projekt ambicioz që ka për qëllim të sjell në Kosovë dhe Shqipëri nxënësit e moshave të ndryshme të shkollës shqipe për tu njohur më mirë me atdheun dhe me bashkëmoshatarët e tyre. Tani ky projekt për herë të parë bëhet së bashku nga dy ministritë në Kosovë dhe Shqipëri”, tha më tej ministri i Diasporës dhe Investimeve Strategjike, dhe njëherësh zv. kryeministri i Kosovës, Dardan Gashi.

Në fund të takimit si pjesë e konkluzioneve ishte dakordimi për formimin e këshillit koordinativ të mësuesve për propozime të përbashkëta lidhur me ruajtjen dhe kultivimin e gjuhës dhe identitetit shqiptar në diasporën amerikane. Në këtë kontekst po ashtu u vendos për mbajtjen e festivalit të shkollave shqipe në fund të muajit maj.

Dy ministrat më pas vazhduan në takimin me komunitetin shqiptar në Connecticut, ku me ndihmën e afaristit të suksesshëm Richard Luka, është ndërtuar edhe Qendra e Kulturës Shqiptare ku përpos aktiviteteve kulturore që organizohen për fëmijët e moshave të reja, aty organizohet edhe mësimi plotësues i gjuhës Shqipe.

Ndërsa gjatë takimit të fundit me shoqatën e shkrimtarëve shqiptaro amerikane , dy ministrat u njoftuan me aktivitetin e kësaj organizate, me numrin e librave të botuar nga rreth 100 anëtarë të saj, ndërsa kërkuan mbështetjen nga dy shtetet ashtu që krijimtaria e anëtarëve të shoqatës të jetë akoma më voluminoze.

Në planin afatshkurtër, kjo shoqatë planifikon edhe funksionalizimin e një biblioteke historike me libra të vjetër të gjuhës shqipe nga arkivat e ndryshme të cilat janë mbledhur tashmë për vite me radhë.