Pasi kanë nënshkruar në Prishtinë Marrëveshjen e Bashkëpunimi për Abetaren e re të përbashkët unike Kosovë-Shqipëri, dy ministret e Arsimit, Arbërie Nagavci dhe Evis Kushi, e kanë përmbyllur “ditën e jashtëzakonshme” me një aktivitet të përbashkët kulturor në Gjakovë.

Nagavci dhe Kushi kanë marrë pjesë në koncertin e shkollave të muzikës nga Kosova dhe Shqipëria, që është mbajtur në Sallën e koncerteve të shkollës së mesme të muzikës “Prenk Jakova” në Gjakovë, raporton Ekonomia Online.

“Kam kënaqësinë që të jemi sot bashkë në përmbyllje të kësaj dite që e filluam me një takim të këndshëm edhe shumë produktiv”, deklaroi Nagavci, në nisje të koncertit.

“Në mëngjes nënshkruam marrëveshjen e protokollit të bashkëpunimit në lidhje me abetaren e përbashkët unike, abetaren e re për vitin 2022/23, të cilën do t’u bëjmë dhuratë fëmijëve në 110-vjetorin e Pavarësisë së Shqipërisë, duke u angazhuar dhe marrë përsipër të punojmë fort me ekipet e dy ministrive, që fëmijët tanë t’u ofrojmë një tekst cilësor që u përshtatet kërkesave e nevojave të ditëve të sotme”.

“Kemi vendosur që së bashku me ministren Kushi në përmbyllje të ditës së sotme të jemi në këtë aktivitet të përbashkët kulturor”, tha Nagavci.

E ministrja e Arsimit e Shqipërisë theksoi se “ky koncert është si qershia mbi tortë e një dite të jashtëzakonshme për gjithë kombin shqiptar”.

“E nënshkruam marrëveshjen e bashkëpunimit për abetaren unike të përbashkët. Jemi angazhuar fort që vitin e ardhshëm, që është edhe 110-vjetori i Pavarësisë së Shqipërisë, ne t’u bëjmë një dhuratë të gjithë vogëlushëve tanë në të dyja anët e kufirit, pikërisht abetaren një komb, një gjuhë, një abetare”, tha ajo.

Drejtori i Shkollës së Muzikës “Prenk Jakova”, Kastriot Sada, tha se përzgjedhja e shkollës së tyre për shënimin e kësaj ngjarjeje iu bën nderë. “Dhe na detyron që punët e deritanishme t’i çojmë përpara për ta ngritur zërin e muzikës kudo në botë”.

Kosova dhe Shqipëria që nga viti 2012 kanë pasur Abetaren e përbashkët, e cila është ende në përdorim në sistemin arsimor të Kosovës.

Abetarja e re do të jetë në përdorim për nxënësit e të dy vendeve nga viti shkollor 2022/23 për nderë të 110-vjetorit të Pavarësisë së Shqipërisë.