Opinionisti Shkëlzen Gashi, përmes një postimi në llogarinë e tij në Facebook, ka reaguar pas riaktualizimit të skandalit financiar në Slloveni, e ku dyshohet të jetë i përfshirë edhe ambasadori i Kosovës në Kroaci, Martin Berishaj.
Për më tepër, gazeta sllovene Prava, shkroi një artikull ku thuhej se kryeministri i Kosovës, Albin Kurti, dhe presidentja e Kosovës, Vjosa Osmani, kanë marrë para nga Martin Berishaj për kampanjat e tyre të fundit elektorale.
Gashi tha se krerët e institucioneve të Kosovës, duke u munduar ta mbrojnë ambasadorin Berishaj, “po i vërtetojnë pretendimet se mund të jenë financuar prej tij”.
Madje, ai e cilësoi diplomatin kosovar me nënshtetësi sllovene si “hajduk”, duke kujtuar një deklaratë të Berishajt në Komisionin Hetimor për Menaxhimin e Energjisë.
“Ambasadori i Kosovës në Kroaci, Martin Berishaj, kur dëshmoi para disa javëve në Komisionin Hetimor për Menaxhimin e Energjisë, kërkoi që mjetet e dedikuara për ardhjen e tij në Kosovë për të dëshmuar në këtë komision, t’i dhurohen një familjeje në nevojë. Demek, unë jam humanist. Jo, ti, Martin Berishaj, je hajduk”.
“Dorëheqja nuk mjafton”, shkroi Gashi.