Ministrja Gërvalla priti në takim zëvendësministrin grek Fragogiannis, diskutohet thellimi i raporteve midis dy vendeve, dhe përkrahja e rrugës euroatlantike të Kosovës

Zëvendëskryeministrja e Republikës së Kosovës, njëherësh Ministre e Punëve të Jashtme dhe Diasporës e Republikës së Kosovës, Donika Gërvalla, sot priti në takim zyrtar një delegacion grek të kryesuar nga zëvendësministri i Punëve të Jashtme për Diplomaci Ekonomike i Republikës së Greqisë, Kostas Fragogiannis.

Takimi filloi me falënderimin e Ministres Gërvalla për mikpritjen në Forumin Ekonomik në Delphi, të zhvilluar javën e kaluar, i cili u vlerësua nga ana e saj si shumë i përzemërt dhe i dobishëm për rajonin në përgjithësi, dhe në veçanti për Republikën e Kosovës.

Temë kryesore midis dy delegacioneve ishte nevoja për thellimin e mëtejshëm të raporteve midis Republikës së Kosovës dhe Republikës së Greqisë në të gjitha sferat me interes për popujt e të dyja vendeve, sidomos në ekonomi, tregti, arsim, kulturë e turizëm.

Gjatë këtij takimi, vend të theksuar zuri edhe diskutimi mes palëve mbi situatën e krijuar pas agresionit ushtarak të Federatës Ruse në Ukrainë, si dhe rreziqet që i kanosen rajonit.

Ministrja Gërvalla përsëriti se Republika e Kosovës dhe populli i saj solidarizohet me Ukrainën dhe dënon invazionin rus. Kosova, tha ajo, mbështet integritetin territorial, sovranitetin dhe pavarësinë e Ukrainës, dhe qysh në fillim është rreshtuar përkrah aleatëve të saj, duke iu bashkangjitur sanksioneve të Bashkimit Evropian dhe Shteteve të Bashkuara të Amerikës.

Duke folur për rreziqet që mund të ketë rajoni nga agresioni ushtarak rus ndaj Ukrainës, Ministrja Gërvalla theksoi se përkrahja e vazhdueshme e Serbisë ndaj aleatit të saj, Rusisë, edhe në këtë rast, kërkon një mesazh dhe pozicionim të qartë të BE-së.

Në fund të këtij takimi, zëvendësministri i Punëve të Jashtme dhe Diasporës i Republikës së Kosovës, Kreshnik Ahmeti dhe homologu i tij grek, Kostas Fragogiannis, nënshkruan dokumentin e formalizmit të bashkëpunimit në fusha të ndryshme midis dy shteteve