Qeveritë e Gjermanisë dhe Zvicrës kanë bërë të ditur se kanë mbyllur përkohësisht ambasadat e tyre në Teheran, për shkak të situatës së sigurisë.

Sipas njoftimit, ambasadori i Zvicrës së bashku me pesë anëtarë të stafit diplomatik janë larguar sot nga Irani përmes rrugës tokësore dhe aktualisht ndodhen në një vend të sigurt jashtë territorit të vendit.

Edhe Gjermania ka vendosur të zhvendosë përkohësisht misionin e saj diplomatik në Teheran, si dhe dy misionet e saj diplomatike në Irak.

Këto veprime vijnë në një kohë kur gjithnjë e më shumë shtete po marrin masa të ngjashme për shkak të shqetësimeve të sigurisë. Mes vendeve që thuhet se kanë evakuuar stafin diplomatik ose kanë mbyllur ambasadat e tyre janë edhe Argjentina, Austria, Azerbajxhani, Islanda, Italia, Holanda, Zelanda e Re, Serbia, Spanja, Mbretëria e Bashkuar dhe Ukraina.