Kryetari aktual i Gjilanit, Lutfi Haziri, ka bërë sot promovimin e projektit online “Biblioteka ime”, që është ende në fazën e pilotimit, por që ka qëllim digjitalizimin e gjithë literaturës së Bibliotekës së Qytetit “Fan S. Noli”.

Ky projekt mundëson përpos leximit elektronik edhe krijimin e databazës së këtij institucioni dhe statistikat tjera që kanë të bëjnë me leximin, moshat, librat dhe autorët më të lexuar dhe detajet të tjera brenda një domeni dhe gjithçka në formë elektronike.

“Ky projekt po vie pas shumë programeve dhe projekteve online të zbatuara tashmë në Gjilan. Si program po lansohet sot pas atij që tashmë ka filluar në shëndetësinë primare dhe do të vazhdohet edhe me programe të tjera të ngjashme. Apliko online, home Komuna, e-kiosqet, e-prokurimi, e-shendetësia dhe tash Biblioteka Ime, janë projekte që Gjilanit tashmë i kanë dhënë epitetin e risive në nivel vendi, sa i përket përdorimit të teknologjisë informative në dhënien e shërbimeve për qytetarë”, ka thënë kryetari i Gjilanit, Lutfi Haziri.

“Kjo i mundëson Bibliotekës ta mbaj nën kontrollë të saj librin, përdorimin e tyre, mundëson që lexuesit që të kenë qasje në të gjithë titujt që ka ky institucion, autorët dhe veprat e tyre, prindërit e fëmijëve, për të kontrolluar statistikat e leximit të librave nga ana e fëmijëve të tyre etj. Ky program Gjilanin përsëri e vendos në kalendarin e avancimit si Komuna e parë në nivel të Republikës së Kosovës, por edhe të regjionit. Ky është një standardizim i punës së Bibliotekës dhe lehtësimin e shërbimeve”, ka thënë Haziri.

I pari i Gjilanit ka thënë poashtu se legjislatura e zgjedhur tashmë në Kuvendin Komunal në vitin e ardhshëm do të bëjë emërtimin e kësaj Biblioteke me emrin e njeriut të letrave shqipe, autorit të mirënjohur në nivel Kombëtar, Beqir Musliu.