I ashpër ka qenë reagimi i anëtarit të Kryesisë së PDK-së, Betim Gjoshi, pas vendimit të Qeverisë për të vendosur orën policore, e cila sipas Gjoshit ka për qëllim të parandalojë mbledhjen e deputetëve për rrëzimin e Qeverisë Kurti.

Gjoshi i është drejtuar Kurtit duke i thënë se “mund të mos kishe tentuar të fshiheshe si frikacak pas fjalëve, ashtu siç ke bërë gjithmonë”, por “mund të kishe marrë vendim për arrestimin e 80 deputetëve të Kuvendit të Republikës së Kosovës. Sigurisht se ti nuk i arreston 29 deputetët e VV-së dhe as 10 të Listës Serbe që të kanë mbetur bashkëpunëtorët e vetëm me Vjosa Osmanin”.

Ky është qëndrimi i tij i plotë:

Albin K. nuk ke pasur nevojë të marrësh vendim për orën policore për të pamundësuar lëvizjen e qytetarëve dhe deputetëve.

Mund të mos kishte tentuar të fshiheshe si frikacak pas fjalëve, ashtu siç ke bërë gjithmonë.

Po ta bëj më të thjesht – Mund të kishe marrë një vendim për arrestimin e 80 deputetëve të Kuvendit të Republikës së Kosovës. Sigurisht se ti nuk i arreston 29 deputetët e VV-së dhe as 10 të Listës Serbe që të kanë mbetur bashkëpunëtorët e vetëm me Vjosa Osmanin.

Mjerisht këta janë të vetmit bashkëpunëtorë që të kanë mbetur, sepse askush nuk pranon t’i bashkohet luftës tënde të rrezikshme për mbrojtjen e pushtetit.

Sigurisht se ju nuk shqetësoheni për Kushtetutën dhe Ligjet që janë themele të funksionimit të shtetit të Kosovës. Ju nuk mund të shqetësoheni për diçka që e keni luftuar çdo ditë. Ju e keni luftuar shtetin e Kosovës po aq sa e kanë luftuar Aleksandër Vuqiqi, Ivica Daqiqi e Marko Gjuriqi.

Por, kjo nuk do t’iu shpëtojë nga përgjegjësia historike që keni në këtë kohë krize për rrezikimin e ekzistencës së shtetit demokratike të Kosovës. Ju tashmë i keni siguruar vetës një vend në histori – atje ku qëndrojnë palaqot. Po-po, palaqot që dështuan të imitojnë liderët diktatorialë të botës të cilët me çmendurinë e tyre shkatërruan popujt e vet.