Ministrja e Drejtësisë, Dhurata Hoxha priti në takim Drejtorin e Përgjithshëm të Radio Televizionit të Kosovës,  Mentor Shala.

Shala, uroi Ministren Hoxha për pozitën dhe detyrat e reja, njёherit ofroi bashkëpunim. Ai gjithashtu njoftoi ministren Hoxha rreth punëve dhe angazhimeve në kuadër të Televizionit Publik si dhe shprehu përkushtimin për informim të paanshëm.

Në takim, ministrja Hoxha theksoi se krahas mandatit të saj në Ministrinë e Drejtësisë do të vazhdojë bashkëpunimin dhe komunikimin e afërt me mediat, shoqërinë civile, dhe qytetarët.

Gjatë takimit, të dyja palët vlerësuan si tejet të rëndësishëm bashkëpunimin e deritanishëm në fusha të ndryshme, me theks të veçantë në fushën e informimit dhe komunikimit me qytetarët në lidhje me te drejtat e tyre, si dhe u dakorduan që të punohet edhe më tej në forcimin e bashkëpunimit edhe në forma më konkrete.

Posaçërisht, Ministrja Hoxha theksoi se liria e shprehjes, pavarësia dhe mos cenimi i punës së mediave dhe përkrahja në punë, duhet të mbrohen dhe ne si shtet jemi të vendosur ta ruajmë dhe kultivojmë një frymë të tillë.

Njёherit të dyja palët u dakorduan që gjuha kërcënuese, urrejtëse, dhe linçuese, duhet të ndalet dhe se klima e krijuar me pasiguri dhe rrezik për qytetarët duhet të dënohet. Me këtë rast, Ministrja e Drejtësisë ftoj organet përgjegjëse të sundimit të ligjit të marrin veprime të shpejta që të gjithë akterët e veprave të dhunshme të javëve të fundit të përgjigjen para ligjit.