“Italia është një nga ekonomitë e fuqishme të botës, është afër gjeografikisht dhe e konsiderojmë partner strategjik në fushën e bashkëpunimit ekonomik në të ardhmen”, kështu tha kryeministri Ramush Haradinaj, gjatë takimit me delegacionin e  Dhomës së Tregtisë Itali –Kosovë, të kryesuar nga ish ministri i Jashtëm italian, Giulio Terzi, Gianvitorio Abate dhe Riccardo Paunceli.

Në takim është biseduar për mundësitë e bashkëpunimit ekonomik dhe rritjes së investimeve italiane në Kosovë.

Kryeministri Ramush Haradinaj, ka njoftuar delegacionin italian me angazhimin e Qeverisë së Republikës së Kosovës për të krijuar një ambient sa më të përshtatshëm dhe miqësorë për zhvillimin e bizneseve, që do të kontribuonte në zhvillimin e përgjithshëm ekonomik, rritjen e vendeve të punës dhe të mirëqenies së qytetarëve të Republikës së Kosovës.

Në këtë kontekst, kryeministri Haradinaj ka falënderuar angazhimin e Dhomës së Tregtisë Itali -Kosovë në rritjen e bashkëpunimit të bizneseve italiane dhe atyre kosovare dhe mbrojtjen e interesave të ekonomive të dyja vendeve.

Kryeministri Haradinaj ka theksuar se thithja e investimeve të huaja, sidomos nga vendet anëtare të Bashkimit Evropian trajtohet me prioritet nga Qeveria e Republikës së Kosovës.

Anëtarët e delegacionit të Dhomës së Tregtisë Itali -Kosovë, kanë theksuar faktin se në vitet e fundit raportet miqësore ndërmjet Kosovës dhe Italisë janë zhvilluar në mënyrë të konsiderueshme, për çka kanë kontribuar takimet e shpeshta ndërmjet përfaqësuesve të qeverive dhe parlamentarëve si dhe pjesëmarrja në konferenca të ndryshme.

Në takim të pranishëm ishin edhe ministri i Zhvillimit Ekonomik, Valdrin Lluka dhe ambasadorja e Kosovës në Itali, Alma Lama.