“I sigurojmë qytetarët e Komunës së Suharekës se Kosova është me ta në sanimin e dëmeve që kanë ndodhur si pasojë e vërshimeve”, kështu tha kryeministri Ramush Haradinaj gjatë vizitës që i bëri sot Komunës së Suharekës, ku ka parë nga afër dëmet e shkaktuara në këtë komunë pas reshjeve të shiut.

Kryeministri Haradinaj, i shoqëruar nga zëvendëskryeministri Enver Hoxhaj, ministrat Bedri Hamza e Bejtush Gashi, është pritur në takim nga kryetari i Komunës së Suharekës, Bali Muharremaj me bashkëpunëtorë, ku është njoftuar për dëmet e shkaktuara në këtë komunë.

Kryeministri Haradinaj, ka përgëzuar qytetarët e Suharekës, institucionet komunale, kryetarin, të gjitha grupet parlamentare politike, FSK-në, Policinë, zjarrfikësit dhe të gjithë ata që ishin të mobilizuar në evitimin e kësaj gjendjeje.

“Tani jemi në kohën kur duhet t’i sanojmë pasojat e këtyre dëmeve dhe komuna ka vendosur ta ridedikoj një fond të caktuar. Niveli nacional do ta përkrah këtë ridedikim që të kaloj në dedikim emergjent për familjet që janë dëmtuara”, tha kryeministri Haradinaj.

Pas takimit, në një deklaratë për media, kryeministri Haradinaj tha se Qeveria ka hyrë në obligim që të alokoj një fond emergjent dhe njëkohësisht ka marrë obligim për sanimin e plotë të pasojave të shkaktuara në bazë të procedurave të rregullta që parashihen me ligj, pasoja këto të shkaktuara në infrastrukturë publike, institucione publike, ekonomi familjare, biznese etj.

Ministri i Financave, Bedri Hamza, tha se qeveria do të ndaj edhe një shumë emergjente prej 1.1 milion euro që do t’i bashkëngjitet shumës prej rreth gjysmë milioni dhe fondi emergjent arrin shumë mbi 1.5 milion euro, mjete këto që do të dedikohet për situata emergjente për përkrahjen e familjeve në nevojë.

Kryetari i Komunës së Suharekës, Bali Muharremaj, tha se e ka njoftuar kryeministrin, zëvendëskryeministrin dhe ministrat për gjendjen aktuale që ka ndodhur në komunë pas vërshimeve nga reshjet e shiut.
Kryetari Muharremaj, falënderoi kryeministrin për vizitën, duke thënë se në bashkëpunim me shefat e grupeve parlamentare, Komuna e Suharekës ka ndarë një fond të veçantë prej 430 mijë euro për sanimin e dëmeve.

Kryeministri Haradinaj vizitoi edhe objektin e komunës i cili është përfshirë nga vërshimet e fundit, njësinë zjarrfikëse dhe shpëtuese, ku u njoftua për gjendjen pas vërshimeve në këto institucione, duke premtuar edhe sanimin sa më të shpejtë të dëmeve.

Vizitën e tij, kryeministri e vazhdoi në fshatin Grejkoc, ku pa nga afër ekipet e FSK-së të cilët janë duke bërë sanimin e dëmeve të shkaktuara në këtë fshat, si dhe disa familje të prekura nga vërshimet në fshatin Sopijë.