Një 64-vjeçar nga Gjermania humbi jetën tragjikisht gjatë një ngjitjeje malore në Alpet Zillertal, në Austri. Burri ishte ngjitur në malin Olperer, 3476 metra të lartë, së bashku me djalin e tij 38-vjeçar dhe nipin 36-vjeçar.

Tre burrat kishin kaluar natën në një strehë malore dhe ishin nisur në mëngjes drejt majës. Para mesditës, ata arritën në destinacion dhe, pas një pushimi të shkurtër, nisën zbritjen drejt Ginzlingut.

Rreth orës 13:00, gjatë zbritjes, djali dhe nipi, të cilët po ecnin disa metra përpara, dëgjuan papritur një britmë. Kur u kthyen, panë 64-vjeçarin duke u rrëzuar në një terren të pjerrët shkëmbor.

Ai ra rreth 80 metra në thellësi, shkruajnë mediat gjermane, transmeton Klankosova.tv.

Familjarët telefonuan menjëherë shërbimet e emergjencës dhe zbritën drejt tij, duke nisur përpjekjet për reanimim. Në ndihmë u afruan edhe alpinistë të tjerë që ndodheshin pranë vendit të ngjarjes.

Kushtet e motit vështirësuan ndërhyrjen e ekipeve të shpëtimit. Helikopteri nuk mundi të afrohej drejtpërdrejt te vendi i aksidentit. Mjeku urgjent u zbrit më poshtë dhe më pas iu desh të përshkonte në këmbë rreth 200 metra lartësi për të arritur te viktima.

Pavarësisht përpjekjeve për ta shpëtuar, 64-vjeçari ndërroi jetë në vendngjarje, si pasojë e plagëve të rënda.

Pas përfundimit të hetimeve, ekipet e shpëtimit malor nxorën trupin e tij, ndërsa një helikopter e transportoi drejt Schlegeis. Për familjarët e viktimës u aktivizua gjithashtu një ekip i specializuar për ndërhyrje në situata krize.

Olpereri konsiderohet një nga destinacionet sfiduese për alpinistët, pasi edhe rruga normale për në majë kalon në terren të pjerrët dhe në disa pjesë kërkon ngjitje në shkëmbinj.

Shkaqet e sakta që çuan në humbjen e ekuilibrit dhe rrëzimin fatal të 64-vjeçarit mbeten ende të paqarta.