Ish-drejtori i Policisë së Kosovës, Rashit Qalaj ka aderuar në Partinë Demokratike të Kosovës, raporton Ekonomia Online.

Kandidati për kryeministër të Kosovës, nga radhët e PDK-së, Enver Hoxhaj është shprehur se ardhja e Qalajt është dëshmia e radhës se Partia Demokratike ka hapur dyert e saj për kuadro të reja profesionistësh dhe për të gjitha ata që duan të kontribuojnë në Rimëkëmbjen e Kosovës.

“Së bashku me zotin Qalaj do ta kemi programin më të avancuar për Rimëkëmbjen e sektorit të sigurisë, i cili është goditur nga dy qeveritë e fundit. Kosova ka nevojë për Rimëkëmbje të sektorit të sigurisë dhe jo për qeveri që i lënë me ushtrues detyre edhe Policinë edhe AKI-në, në një kohë kur vendi ishte i kërcënuar jashtë dhe brenda.”, ka thënë Hoxhaj.

Hoxhaj ka thënë se Rashit Qalaj, me përvojën e tij të madhe në fushën e sigurisë, do të jetë motori i Rimëkëmbjes që PDK do ta sjellë në sektorin e sigurisë.

“Zoti Qalaj nuk e ka thjesht vetëm përvojën 20-vjeçare menaxheriale në Policinë e Kosovës, por ka edhe përgatitijen e lartë profesionale në fushën e sigurisë përmes aftësimit dhe ngritjes profesionale që e ka pasur në Gjermani, Austri, Britani të Madhe dhe ka udhëhequr institucionin më kredibil që ka Kosova. Rimëkëmbja e sektorit të sigurisë nënkupton që këtë sektor do ta ndërtojmë sipas kritereve më progresive që ekzistojnë në shtetet anëtare të NATO-s.Rashit Qalaj ka qenë edhe luftëtar i Ushtrisë Çlirimtare të Kosovës. Pra natyrisht që do të jetë pjesë e Rimëkëmbjes kombëtare për të cilën angazhohemi si qeveri e ardhshme e Kosovës.”, ka thënë ai.

Hoxhaj ka theksuar se Qalaj është sinonimi i mijëra shërbyesve të sektorit publik të cilët kërcënohen të largohen nga puna për shkak të hakmarrjeve politike të politikanëve autoritarë, prandaj, sot ai po bëhet pjesë e vizionit të Rimëkëmbjes kombëtare.

“Rashit Qalaj me shokë që dikur e rimëkëmbën atdheun me luftën e tyre çlirimtare, sot do ta rimëkëmbin atdheun nga kriza ekonomike që ka ardhur pas 6 tetorit 2019. Unë si kryeministër, Rashit Qalaj dhe tërë ekipi i Rimëkëmbjes do ta rimëkëmbim Kosovën dhe sërish do ta kthejmë epokën e artë të Kosovës kur rriteshin pagat, kur shtroheshin rrugë, kur ndërtoheshin shkolla të reja, kur nuk kishte reduktime të energjisë elektrike dhe kur kishim marrëdhënie të shkëlqyeshme me aleatët amerikanë dhe evropianë. Cdo ditë e më tepër po rritet besimi për PDK-në. Së bashku do ta rimëkëmbim Kosovën dhe do t’ia kthejmë dinjitetin qytetarëve të Kosovës.”, ka thënë Hoxhaj.

Ndërkaq, Rashit Qalaj duke e falënderuar Hoxhajn për pritjen ka thënë se është i nderuar që nga sot do të jetë anëtar i PDK-së, partisë së rimëkëmbjes për Kosovën, ku ka shumë miq, shokë e bashkëluftëtarë që kanë ndikuar në etapa të ndryshme të zhvillimit të vendit.

Sipas tij, vitin e fundit kanë ndryshuar rrethanat nga degradimi në institucionet e sigurisë, si pasojë e politikës dhe kjo është arsyeja që ka vendosur të kyçet vetë në politikë.

“Duke parë që nga brenda nuk mund të ndikoj që ky degradim të ndërprehet, meqenëse ky degradim po vie nga politika vendosa që vet të kyqem në politikë që të jap kontributin tim për aq sa kam hapësirë dhe më lejohet që t’i forcojmë këto institucione të sigurisë që të jenë sa më të pavarura sa më të zhvilluara. Besoj që bashkërisht do t’ia dalim”, ka thënë ai.

Kandidati për kryeministër nga PDK-ja, Enver Hoxhaj foli për mundësinë që Vlora Çitaku të jetë pjesë e listës, tha se varet nga dëshira personale e saj, raporton Ekonomia Online.

“Vlora Çitaku është pjesë e PDK-së dhe është pjesë e pandashme e saj sikurse unë”, ka thënë ai.

“Një pyetje të tillë mund të ma bëni vetëm mu a e keni thirrë Enver Hoxhaj, se kush do të jetë pjesë e listës më së paku Vlora ka nevojë për një ftesë të tillë, varet prej vullnetit individual, debatin që e kemi pas brenda PDK-së ne e kemi qartësinë e plotë ka lidership që është për ekzekutiv ka lidership për legjislativ, të gjithë do të jenë në fushatë”, ka shtuar ai.

Tutje, ai tha se asgjë nuk ka ndryshuar sa I përket arritjes së një koalicionit pas zgjedhor me Nismën.

“Kam thirru z.Limaj për të informuar që ka qenë e pamundur që dy partitë tona të kenë një koalicion të tillë, dhe nuk ka ndryshuar asgjë që të kemi një koalicion të përbashkët me Nismën”, përfundoi Hoxhaj.