Kryetari i Sindikatës së Bashkuar të Arsimit, Shkencës dhe Kulturës (SBAShK), Rahman Jasharja po vlerëson se Qeveria ka thyer akullin e barrikadave për dialogim për kërkesat e tyre të kamotshme.

Ai në një prononcim për Ekonomia Online tha se pas takimit që kanë pasur gjatë së martës me ministrat Xhelal Sveçla e Arbërie Nagavci kanë marrë zotim se Ligji i Pagave është duke u punuar në mënyrë intensive nga institucionet përgjegjëse.

Madje ai thotë se kanë marrë zotim se Ligji nuk do të shkojë në Qeveri pa marrë edhe miratimin e sindikatave.

“Është mirë që ndodhi ky takim dhe më në fund besoj që ai akulli i barrikadave të Qeverisë kundër dialogut është thyer dhe uroj të vazhdohet me dialogun. Kemi biseduar për Ligjin e pagave dhe e mira e gjithë këtij takimi është se më në fund nga njeriu i parë i kësaj çështje ministri Sveçla jemi informuar se Ligji është duke u punuar, por edhe ekipi i ekspertëve që ai e ka krijuar janë duke punuar në përpjekje për t’i hequr defektet qe i ka cekur Kushtetuesja dhe ministri Sveçla na premtoi që me të hequr këto defekte në pjesën e dytë të këtij ligji do të ftohen edhe sindikatat dhe na premtoi se versioni final nuk do të shkoj në Qeveri për t’u votuar pa u bërë bashkëbiseda dhe angazhimet me sindikatat”.

Por ai insiston se nëse nuk realizohen kërkesat do të vazhdojnë me veprime sindikale, duke mos përjashtuar grevën e përgjithshme në muajin janar, raporton EO.

“Nesër do ta mbajmë një takim online me kryetar dhe ata që do ta thonë fjalën e fundit. Problem tjetër na doli sepse masat e reja po kufizojnë numrin e pjesëmarrësve qoftë edhe në ambiente të hapura dhe kjo e keqëson situatën dhe mbase kryetarët do të mendojnë për një ide tjetër të cilën nuk e dëshirojmë e që është greva”, tha Jashari.