Gjykata Themelore në Gjilan i ka shpallur fajtorë tre të akuzuarit Sh.B, N.B dhe S.B për lëndim të rëndë trupor ndaj të dëmtuarit S.Q që është zyrtar në Agjencionin Pyjor të Kosovës.

Rasti ka ndodhur në shtator të 2016 në fshatin Zhegovc të Komunës së Gjilanit.

“Të akuzuarit në fjalë shqiptar të Republikës së Kosovës, me datë 01.09.2016 në fshatin Zhegovc të Komunës së Gjilanit, kanë pasur një mosmarrëveshje me të dëmtuarin S. Q. zyrtar në Agjencionit Pyjor të Kosovës, më pas nën kërcënimin e armës, i akuzuari Sh. B. godet disa herë në kokë të dëmtuarin, ndërkohë edhe dy të akuzuarit e tjerë godasin me mjete të fort në trupin e të dëmtuarit, me çka ka pësuar lëndime të rënda trupore, ku është dashur të marr ndihmën mjekësore në Qendrën Klinike Universitare të Kosovës (QKUK)”, thuhet në njoftimin e Gjykatës Themelore të Gjilanit.

Sipas aktgjykimit të Gjykatës Themelore të Gjilanit, i akuzuarit Sh.B dyshohet se ka kryer veprën penale lëndim i rëndë trupor si dhe mbajtja në pronësi, kontroll ose posedim të paautorizuar të armëve të sanksionuara me Kodin Penal të Republikës së Kosovës (KPRK). Për këto dy vepra trupi gjykues ka shpall aktgjykim dënues, duke e dënuar me dy (2) vite burgim dhe gjobë 500 (pesëqind) Euro.

“Të akuzuarit N. B. dhe S. B. për veprën penale lëndim i rëndë trupor, trupi gjykues ka shqiptuar dënim prej një (1) viti burgim”, thuhet tutje në njoftimin e kësaj Gjykate.

Palët kanë të drejtën e ankesës ndaj këtij Aktgjykimi në Gjykatën e Apelit.