Një kitarë legjendare e përdorur nga David Gilmour është shitur për 14.6 milionë dollarë në një ankand në Nju Jork, duke u bërë kitara më e shtrenjtë e shitur ndonjëherë.

Bëhet fjalë për një Fender Stratocaster 1969, e njohur si “Black Strat”, të cilën kitaristi i Pink Floyd e përdori në gjashtë albume të grupit mes viteve 1970 dhe 1983.

Me këtë instrument u regjistruan disa nga albumet më të famshme të rock-ut, si The Dark Side of the Moon, Wish You Were Here dhe The Wall, transmeton KultPlus.

Sipas shtëpisë së ankandeve Christie’s, kitara u shit pas rreth 21 minutash ofertash, ndërsa blerësi mbetet anonim. Fillimisht ishte vlerësuar se instrumenti do të arrinte një çmim mes 2 dhe 4 milionë dollarësh.

Ankandi përfshinte objekte nga koleksioni i biznesmenit amerikan Jim Irsay, i cili ndërroi jetë në vitin 2025.

Shitja e kitarës së Gilmour theu rekordin e mëparshëm që mbahej nga një kitarë e përdorur nga Kurt Cobain gjatë performancës së Nirvana në MTV Unplugged në vitin 1993. Ajo ishte shitur për 6 milionë dollarë në vitin 2020.

Në të njëjtin ankand u shitën edhe disa objekte të tjera të famshme muzikore, përfshirë një kitarë të Jerry Garcia për 11.6 milionë dollarë, tekstet e shkruara me dorë të këngës The Times They Are A-Changin’ nga Bob Dylan, si dhe një piano që i përkiste John Lennon nga The Beatles.

Në total, 44 objektet e koleksionit arritën vlerën e rreth 84 milionë dollarëve në ankand.