Përveç shtatë komunave që aktualisht janë në karantinë, janë edhe gjashtë të tjera që pritet të mbyllen gjatë vikendit.

Aktualisht, këto qytetet janë në zonën e portokalltë të infeksionit, por nëse rastet vazhdojnë të rriten, atëherë Ministria e Shëndetësisë do të marrë masa.

Bazuar në hartën që pasqyron rastet me Covid-19 për 100 mijë banorë, të cilën e ka publikuar Ministri i Shëndetësisë, Armend Zemaj, qytet e tjera ku mund të ndalohen hyrje-daljet në fundjavë janë: Lipjani, Ferizaj, Vushtrria, Juniku, Deçani dhe Peja.

Nëse vazhdon trendi i njejtë i rasteve, atëherë këto komuna do të hyjnë në zonën e kuqe të infektimit dhe do të mbyllen.

Një gjë të tillë e ka paralajmëruar vetë Zemaj, përmes një postimi në llogarinë e tij në Facebook.

 “Çdo komunë tjetër që hynë në zonë të kuqe të infeksionit, sipas numrit të banorëve (sipas hartës), do të ketë masë të njëjtë!”, ka shkruar Zemaj.

Aktualisht, hyrje-daljet gjatë fundjavës ndalohen në Prishtinë, Fushë Kosovë, Gjilan, Obiliq, Gjakovë, Podujevë dhe Shtime.

Hyrjet dhe daljet në këto qytete ndalohen nga e premtja në orën 20:00, deri të hënën në orën 05:00, shkruan Express.

Në këtë periudhë do të mbyllen edhe qendrat tregtare dhe rekreative dhe subjektet që ofrojnë shërbime të gastronomisë në të gjithë territorin e Kosovës.

Vendimi i Ministrisë së Shëndetësisë po ashtu parasheh që furrat e bukës, barnatoret, dyqanet e vogla dhe pompat e derivateve të mbeten të hapura.

Me vendimin e MSh-së, obligohet Policia e Kosovës në çdo hyrje/dalje të bëjë kontroll rigoroz për parandalimin e përhapjes së infeksionit me COVID-19.

“Për të gjithë shkelësit e këtyre masave, organet kompetente obligohen të shqiptojnë masat ndëshkimore konform Ligjit nr. 07/l-006 për parandalimin dhe luftimin e pandemisë covid-19 në territorin e Republikës së Kosovës”, thuhet në njoftimin e MSh-së.