Pjesëmarrja e presidentit malazez Milo Gjukanoviq në takimin në Tiranë në kuadër të nismës së Shqipërisë, Serbisë dhe Maqedonisë së Veriut që njihet si Mini-Shengeni u konfirmua zyrtarisht sot në Podgoricë.

Gjukanoviq do të niset për në Tiranë nesër, me ftesë të kryeministrit shqiptar Edi Rama në takimin e liderëve të Ballkanit Perëndimor pjesë e së cilit janë edhe : presidenti i Serbisë Aleksandar Vuçiq dhe kryeministri i Maqedonisë së Veriut Zoran Zaev .

“Pjesëmarrja e presidentit Gjukanoviq është një konfirmim i angazhimit të Malit të Zi për bashkëpunimin rajonal dhe stabilitetin, përmirësimin e marrëdhënieve të fqinjësisë së mirë, si dhe përgjegjësinë e tij ndaj detyrimeve që rrjedhin nga procesi i negociatave me BE-në. Gjithashtu, takimi i Tiranës është një mundësi për një dialog të hapur për zhvillimet në rajon, përparësitë e përbashkëta të zhvillimit dhe perspektivën evropiane të Ballkanit Perëndimor”, thuhet në njoftimin e presidencës malazeze rreth vizitës së Gjukanoviqit në Shqipëri, transmeton Klan Kosova.

Për pjesëmarrjen e kreut të shtetit malazez në takimin e liderëve të Ballkanit Perëndimor në Tiranë, është shprehur i kënaqur edhe homologu i tij serb, Aleksandar Vuçiq.