Kosova i ka dërguar porosi Bashkimit Evropian se më nuk do të paguajë asnjë cent për energjinë e shpenzuar në veri.

Një porosi BE-ja do ta marrë në formë zyrtare nga Klaus Toepfer, ish-ministër gjerman i Ambientit, i cili është caktuar ndërmjetësues nga Qeveria Gjermane për të ndihmuar në zgjidhjen e problemit për çështjen e energjisë elektrike ndërmjet Kosovës dhe Serbisë.

“Ne i kemi kërkuar zyrtarit gjerman që t’ia bëjë kërkesën BE-së që të paguajë shpenzimet e energjisë në muajt e ardhshëm, derisa të gjendet një zgjidhje për bllokadën e marrëveshjes së energjisë, pasi buxheti i Kosovës nuk ka mundësi që të paguajë energjinë e shpenzuar atje. Ne kemi kërkuar që marrëveshja të bëhet sikur për telefoninë”, i ka thënë KTV-së në kushte anonimiteti një zyrtar i lartë i Qeverisë së Kosovës.
Ai ka bërë të ditur se shpresat janë që brenda 3 muajve të zhbllokohet marrëveshja e energjisë.

Qeveria ka refuzuar të japë më shumë informata rreth këtij takimi, pos përmbajtjes së komunikatës së lëshuar.

Zyrtari gjerman është takuar edhe me drejtuesit e KOSTT-it, por as zyrtarët e kësaj kompanie nuk kanë pranuar të japin më shumë detaje.

Shefi i bisedimeve me Serbinë, Avni Arifi, i ka konfirmuar KTV-së se çështja e energjisë do të diskutohet në takimin e ardhshëm mes të dyja vendeve në Bruksel.

BE-ja ka konfirmuar se takimi i ri do të mbahet gjatë këtij muaji.

Marrëveshja e energjisë është një nga marrëveshjet që nuk ka lëvizur fare.

Serbia vazhdon ta bllokojë atë, duke bërë shkelje me regjistrimin e kompanisë serbe në veri të vendit.

Për të njëjtën u dërgua aplikacioni për regjistrim, por që i njëjti ishte në kundërshtim me marrëveshjen e arritur.

Për shkak të kësaj bllokade, Operatori i Sistemit të Transmisionit dhe Tregut nuk po mund të anëtarësohet në Rrjetin Evropian të Transmisionit, pavarësisht kushteve të plotësuara.

Si pasojë e kësaj bllokade, para pak ditësh, Kosova ka shkaktuar problem të madh të energjisë në të gjithë Evropën.

ENTSO-ja ka njoftuar se Kosova kishte tërhequr 113 gigavat energji më shumë sesa prodhimi i energjisë, duke shkaktuar hendek në furnizimin me energjinë.

Si rezultat i këtij veprimi, frekuenca e rrjetit evropian kishte devijuar në gati gjashtë minuta.

Llogaritet se Kosovës i duhen deri në rreth 5 milionë euro për të kompensuar mungesën e energjisë.