Kryetari i AAK-së, Ramush Haradinaj, tha se qeveria duhet të dërgojë draft-statutin për formimin e asociacionit në Gjykatën Kushtetuese si obligim i marrë nga marrëveshja e Brukselit dhe aneksi i Ohrit, por siç theksoi, si kundërvlerë të marr anëtarësimin në NATO me procedurë të përshpejtuar.

Haradinaj, tha se në të kaluarën formimi i asociacionit të komunave me shumicë serbe kishte kundërvlerë njohjen nga Serbia ndërsa tash vendi gjendet në një situatë të vështirë. Ai, foli për një kontratë bilaterale me SHBA-të, të cilën e vuri në pah edhe në një takim në Departamentin Amerikan të Shtetit, me ndihmës asistentin e sekretarit të shtetit për çështje të Evropës, Alexander Kasanof.

“Në këtë takim, theksova nevojën për një kontratë afatgjate që për synim ka anëtarësimin e përshpejtuar të Kosovës në NATO, pasi ky është një hap jetik për garantimin e sigurisë dhe paqes së qëndrueshme në rajon.”, tha Haradinaj.

Në anën tjetër ish-komandanti i FSK-së, Kadri Kastrati, vlerëson se anëtarësimi i Kosovës në NATO nuk shihet në horizont, jo për fajin e FSK-së, e cila sipas tij, i ka plotësuar kushtet kohë më parë. Kastrati vlerëson se çështjet e hapura me Serbinë dhe katër shtetet të cilat nuk e njohin Kosovën janë problemi kyç për këtë çështje.

“ Për këtë arsye jemi shumë larg sa i përket FSK-së është e gatshme të hyjë në NATO dhe jemi para disa shteteve të rajonit të cilat tashmë janë në NATO por këto janë çështje politike dhe tash për tash nuk jemi në horizont. Te gjitha këto deklarata i shof si politike edhe të zyrtarve qeveritar edhe të tjerëve pra bëhen për konsum të brendshëm dhe parazgjedhor sepse Evropa dhe NATO nuk janë të gatshëm për këtë çështje”, tha Kastrati për RTV21.

Ditë më parë, ndërkaq, ndihmës sekretari i përgjithshëm i NATO-s, Boris Ruge tha se tani për tani nuk mund të flitet për anëtarësimin e Kosovës në NATO. Madje, sipas tij, vendi nuk është duke ecur as drejt partneritetit për paqe që është  një hap para anëtarësimit të plotë në NATO. Derisa ministria e Mbrojtjes nuk na dha një përgjigje për këtë çështje, ushtaraku i pensionuar, Hysen Gecaj, vlerëson se Kosova çdo ditë e më shumë po e humbë besimin e partnerëve ndërkombëtarë.

“ Këto varen në aspektet politike dhe them ktu për faktin se kohëve të fundit kemi pasur shumë penalty në kuptimin politik dhe I kemi humbur ato duke e humb edhe besimin që dikur NATO kishte në politikën kosovare dhe gjithmonë kur humbet besimi në pjesën politike e pëson edhe pjesa profesionale dhe normal që pasojnë deklaratat e ndryshme zyrtare se Kosova nuk është afër NATO-s pra bëhet për shkak të mos besimit”, tha Gecaj.

Në muajin mars të këtij viti Kosova ka avancuar statusin e saj në asamblenë e përgjithshme të NATO-s nga anëtar vëzhgues në anëtar të asocuar, duke pasur të drejtë pejsëmarrje në pothuajse të gjitha aktivitetet e asamblesë parlamentare të NATO-s,  ku mund të prezantojë rezoluta dhe amendamente për rezoluta, por që nuk mund të marr pjesë në votimin e tyre.