Shqipëria është zhytur në një krizë të rëndë hidrike, e cila pritet të përkeqësojë edhe më shumë financat e sektorit energjetik.

Blerja e re do ta çojë faturën totale të importit të energjisë për këtë vit në mbi 200 milionë euro ose gati 2 për qind e prodhimit kombëtar, një rekord i pashënuar më parë, transmeton tch.

Por shqetësimi më i madh i KESH dhe OSHEE është se kriza mund të thellohet më tej, pasi ndryshe nga sa shpresohej situata nuk është përmirësuar as në vjeshtë. Niveli i ujit në Fierzë është rreth 21 metër më i ulët se vjet, ndërkohë që prurjet për muajin nëntor të këtij viti janë 6 herë më pak se nëntori i kaluar duke rezultuar më të ulëta edhe se vitet më të këqija historike.

Këtë vit sektori energjitik u zhty ne krizë prej shpenzimeve të larta për importet. Qeveria u detyrua të rrisë deficitin buxhetor mbi kufirin e parashikuar. Por nëse dimri do të rezultojë i thatë ashtu si vjeshta, vitin e ardhshëm pasojat mbi financat e shtetit do të jenë më të rënda.